Elizabet Tursynbaeva mánerlep syrǵanaýdan AQSh-tyń Anahaim qalasynda ótken «Tórt qurlyq chempionatynda» kúmis júldeger atandy, dep habarlaidy "Ult aqparat".
Tursynbaeva erkin baǵdarlamada 139.37 upai jinap, maýsymdaǵy úzdik nátijesin kórsetti.
Qos baǵdarlama qorytyndysy boiynsha Elizabet Tursynbaeva 207.46 upai jinady. Bul - týrnirdiń kúmis júldegeri atanýǵa laiyq nátije. «Tórt qurlyq chempionatyndaǵy» áielder arasyndaǵy synda japoniialyq Rika Kihira jeńimpaz atandy. Ol jalpy esebi 221.99 upaiǵa qol jetkizdi. Úshinshi orynda - 207.12 upai jinaǵan Japoniianyń taǵy bir ókili Mai Miahara.
«AQSh tórinde sátti óner kórsetkenime qýanyshtymyn. Búgin óz mansabymda tuńǵysh ret tórt ainalymdy salhovty oryndaýǵa tyrystym. Elementti oryndaý kezinde qulap qalsam da, sońyna deiin ainaldyra alǵanym úshin qýanyshtymyn. Eki aptadan beri osy elementti erkin baǵdarlamada oryndap, jattyqqan edim. Bir ret qulaǵan soń, qalǵan sekirý elementterin sátti oryndaǵanyma rizamyn», - deidi Tursynbaeva.
