Belgili mánerlep syrǵanaýshy Elizabet Tursynbaeva endi reseilik maman Eteri Týtberidzeden tálim alatyn boldy. Bilikti bapker men sportshy arasyndaǵy kelisimshart 2022 jylǵy Beijiń Olimpiadasyna deiin jasalǵan, dep habarlaidy "Ult aqparat".
Qyzylordaǵa kelgen saparynda Elizabet Tursynbaeva osyndai jańalyǵymen bólisti. Ol Eteri Týtberidzemen 2012-2013 jyldarda da jumys jasaǵan edi. Odan keiingi bes jylda kanadalyq maman Braian Orserden tálim aldy.
«Men endi Eteri Týtberidzemen jumys jasaimyn. Buǵan deiin Braian Orserdiń aqyl-keńesin aldym. Alda kóptegen jarystar kútip tur. 2019 jyldyń 4-10 aqpan aralyǵynda AQSh-tyń Anahaim qalasynda ótetin tórt qurlyq sheberleriniń basqosýynda el namysyn qorǵaimyn. Odan keiin 2-12 naýryz aralyǵynda Reseidiń Krasnoiarsk qalasynda stýdentter arasynda búkilálemdik qysqy ýniversiada jalaýyn kóteredi. Sondai-aq, 18-24 naýryz aralyǵynda Japoniiada mánerlep syrǵanaýdan álem chempionaty bolady. Men sol jarystarǵa qatysýǵa ázirlik jasap júrmin», - dedi Elizabet Tursynbaeva.
Elizabet biyl tuńǵysh ret eresekter arasyndaǵy qysqy Olimpiada oiyndarynda baq synady. Onda jekelei synda qazaqstandyq sportshy Elizabet Tursynbaeva jalpy esepte 12-oryn aldy. Odan keiin 18-22 qyrkúiek aralyǵynda Slovakiianyń Bratislava, 4-8 qazan aralyǵynda Finliandiianyń Espoo qalalarynda ótken Chelendjer seriiasy boiynsha halyqaralyq týrnirlerde júldegerlar qatarynan kórindi.
«Elizabettiń osyndai tolaǵai tabystarǵa kenelýine bizdiń elimizdiń tarapynan úlken qoldaý jasalyp keledi. Qyzylorda oblysy basshylyǵy onyń túrli jarystarǵa qatysýyna qamqorlyq kórsetedi. Sondyqtan jasaǵan qamqorlyǵy úshin barlyq azamatqa alǵys bildiremin», - dedi Elizabettiń ákesi, sporttyq menedjeri Baitaq Tursynbaeva.
Sondai-aq, biyl sáýir aiynda Elizabet Tursynbaeva Qyzylordada óz izbasarlaryna sheberlik sabaǵyn ótkizdi. Bul jolǵy saparynda da jas órenderge tálim beretin bolady.
