Almaty qalalyq politsiia departamenti Kriminaldyq politsiia basqarmasynyń basshysy J.Ziadin blokpostan ótip ketken elitaly kólikter úshin jumysynan shyǵaryldy, - dep habarlady QR Ishki ister ministrligi Telegram paraqshasynda.
Almatyda blokpost arqyly zańsyz ótý faktisi boiynsha tótenshe jaǵdai rejimin buzǵany úshin 5 adam ustalyp, 10-nan 15 táýlikke deiin tutqyndaý túrindegi ákimshilik jaýapqa tartyldy. Barlyq 4 elitaly avtomobil aiyp turaǵyna qoiyldy. Kortejge qatysqan taǵy eki adamǵa izdeý salynǵan. Osy rette atalǵan faktige jol bergen jáne olardyń jolyn kesý sharalaryn qabyldamaǵan politsiia qyzmetkerleri tártiptik jazaǵa tartyldy.
Buǵan qosa, Kriminaldyq politsiia basqarmasynyń bastyǵy J.Ziadin, sondai-aq patrýldik politsiia polki komandiriniń orynbasary E.Qýanyshbaev qyzmetterinen bosatyldy. 21 sáýir kúni videokonferentsiia bailanysy rejiminde óńirlik bólimshelerdiń basshylarymen ótken keńeste Ishki ister ministri Erlan Turǵymbaev atalǵan faktige qatysty naqty ustanymyn bildirdi.
«Quqyqtyq tártip pen azamattardyń qaýipsizdigin qamtamasyz etý ishki ister organdary qyzmetkerleriniń negizgi mindeti boldy jáne bolyp ta qala beredi. Tótenshe jaǵdai men karantin rejimin buzýǵa, onyń ústine jeke quram tarapynan jol berýge bolmaidy. Muny qatardaǵy qyzmetkerlermen qatar olardyń basshylary da este saqtaýy tiis», - dedi Erlan Turǵymbaev.
Buǵan deiin Almatyda qymbat kóliktermen kortej uiymdastyrǵandar jazalanǵanyn habarlaǵan edik.
