Túrkistan oblysy Saryaǵash aýdanynda Táýelsizdik kúnine arnalǵan merekelik is-shara ótti, dep habarlaidy "Ult aqparat".
Saryaǵash aýdandyq mádeniet úiinde Qazaqstan Respýblikasynyń Táýelsizdik kúnine arnalǵan «Elimniń erkindigi - Táýelsizdik» atty is-shara ótti. Aýdan ákimi Abdýáliev Qairat Amangeldiuly turǵyndardy merekemen quttyqtady.
«Elimizdiń egemendik alyp, halqymyzdyń azattyqqa qol jetkizgen kúni, Táýelsizdigimizdiń 27 jyldyq merekesi qutty bolsyn! Bul aitýly mereke ata-babalarymyzdyń san ǵasyrlar ańsaǵan armanynyń jarqyn kórinisi. Árbir halyq úshin táýelsizdikten qasterli, azattyqtan asyl, egemendikten kieli uǵym joq. Táýelsizdik halqymyzdyń uzaq jyldar boiy ańsaǵan armany bolatyn. Sol arman osydan 27 jyl buryn aqiqatqa ainalyp, 1991 jyly 16 jeltoqsanynda elimiz erkindikke qol jetkizip, elimiz Táýelsizdik aldy. Egemendigimiz baiandy bolyp, azat elimizdiń aspany ashyq bolsyn, barshalaryńyzdyń otbasylaryńyz shattyqqa kenelsin. Táýelsizdik kúni qutty bolsyn!», - dedi ol.
Óz kezeginde, aýdan basshysy birshama azamattardy alǵys hattarmen marapattady. Al, keiingi sóz kezegi Saryaǵash aýdandyq maslihat hatshysy Sadyqov Baqytjan Moldabekulyna berilse, kesh sońy mádeniet úii ónerpazdarynyń daiyndaǵan kontserttik baǵdarlamasyna ulasty.
«Elimniń erkindigi - Táýelsizdik»
