Reseidegi Qazaqstan Elshiliginiń uiytqy bolýymen aqyn Sara beinesi somdalǵan teńdesi joq qylqalam týyndylary men músinder elimizge jiberildi, dep habarlaidy elorda.info.
12 týyndynyń avtory - 1907-2005 jyldar aralyǵynda ómir súrgen reseilik sýretshi, músinshi, arhitektor Margarita Vashenko.
Ol Almaty oblysynda eńbek etken 1955-1960 jyldar aralyǵynda osy sýretterdi salǵan. Aqyn Saraǵa qatysty qundy týyndylarmen birge óner iesiniń Qazaqstanda eńbek etken jyldary jinaǵan arhiv qujattary, hattar men gazet úzindileri de elimizge qaitaryldy. Margarita Vashenko Almaty oblysy Aqsý aýdanynyń Jansúgirov jáne Kóshkental aýyldarynda aqyn Saranyń músinderin, Jansúgirov aýylynda Ilias Jansúgirovtyń músinin jáne Taldyqorǵan oblystyq murajaiynda Ǵani Muratbaevtyń beinesin jasaǵan ataqty arhitektor.
Osy kúnge deiin sýretter toptamasyn kóziniń qarashyǵyndai saqtap kelgen Geliia Timofeeva, bul anamnyń maǵan qaldyrǵan amanaty, sony búgin oryndaýdyń reti tústi deidi. «Naq-Birlik» qoǵamdyq uiymnyń tóraiymy, Almaty oblysy analar alqasynyń múshesi Saltanat Meńlibaevanyń aitýynsha, aqyn Saranyń ǵasyrlyq toiyn toilaǵan kezde Geliia Timofeeva anasynyń qaldyryp ketken murasyn syiǵa tartpaq nietin haty arqyly bildirgen. Sol kezden beri Geliia Timofeevamen hat jazysyp kelgen qoǵam basshysy, endi qundy muralar Almaty oblysy Aqsý aýdany Qapal aýylyndaǵy aqyn Saranyń murajaiynda saqtalatynyn aitady. Geliia Timofeevanyń aitýynsha, anasy Sara aqynnyń beinesin týǵandary men jaqyndarynyń sýretteýinshe beinelegen eken.
Esterińizge sala keteiik, Sara Tastanbekqyzy (1853-1907) - ataqty sýyryp salma aqyn, sóz maitalmany, aitys óneriniń qaitalanbas sheberi. Almaty oblysynyń Qapal aýdanynda dúniege kelgen. Sara Tastanbekqyzynyń Birjan salmen aitysy ǵasyrdan ǵasyrǵa úzilmei jalǵasyp kele jatqan qazaqtyń aitys óneriniń shoqtyǵy biik, kórkem úlgisi.
