Joǵary oqý oryndaryndaǵy ǵylymi keńestiń alqaly basqarý organy retindegi ókilettigin zańnamalyq turǵydan naqtylaý qajet. Bul týraly QR Premer-Ministri Asqar Maminge depýtattyq saýal joldaǵan Aqylbek Kúrishbaev aitty, dep habarlaidy "Ult aqparat".
«Birinshiden, Nazarbaev ýniversitetiniń úlgisi boiynsha otandyq joǵary oqý oryndaryn tolyqqandy avtonomdy basqarýǵa kóshirý jónindegi bastalǵan reformalardyń aiaqtalýyn tezirek qamtamasyz etý kerek. Ekinshiden, ýniversitetterdi zertteý baǵytyndaǵy joǵary oqý oryndaryna ainaldyrý úshin memlekettik qoldaýdyń júieli sharalary qajet. Bul rette AQSh, Germaniia, Qytai, Resei jáne taǵyda basqa memleketterdiń úlgisinde otandyq ýniversitetterdiń ǵylymi - tehnikalyq áleýetin damytýdyń arnaiy baǵdarlamasyn qabyldaý óte mańyzdy», - dedi Senator.
Úshinshiden, onyń atap ótýinshe, úzdik álemdik tájiribege sáikes, ýniversitetter zamanaýi basqarý júiesine aýysýy kerek.
«Atap aitqanda, joǵary oqý oryndaryndaǵy Ǵylymi keńestiń alqaly basqarý organy retindegi ókilettigin zańnamalyq turǵydan naqtylaý qajet. Rektor tek ashyq konkýrs negizinde taǵaiyndalýy tiis. Sonymen qatar, bizdiń rektorlarymyz sheteldik jetekshi ýniversitetterdegidei belgili bir merzimge ǵana sailanyp, aýysyp turýy kerek. Bul joǵary oqý ornynyń serpindi damýyn qamtamasyz etedi jáne jas kadrlardyń básekelestigine jol ashady»,- dedi ol.
Bilim jáne ǵylym ministrliginiń málimetine súiengen senator 2019 jyly mamandardy daiyndaý baǵyttary boiynsha memlekettik bilim berý grantynda oqyǵan ýniversitet túlekteriniń tek 40-74 paiyzy ǵana jumysqa ornalasqan.
«Onyń ózinde olar óz mamandyǵyna sáikes jumysqa ornalasty ma joq pa, belgisiz. Eger jaǵdai ózgermese biz jylda biýdjet qarajatynyń kem degende 10 mlrd teńgesin tiimsiz jumsap otyramyz. Bul dáiekter elimizdiń joǵary bilim salasyndaǵy eleýli kemshilikterdiń betin ashyp otyr. Bul másele tek jeke menshik ýniversitetterdi jabýmen sheshilmeidi. Jalpy elimizdiń ýniversitettik júiesin túbegeili retteitin ýaqyt keldi», - dedi Aqylbek Kúrishbaev.
