Foto: Pexels.com
Senator Sultanbek Mákejanov elimizdiń Premer-Ministri Oljas Bektenovke memlekettik qaryzdyń ósip bara jatqany jáne elimizdiń qarjy resýrsyn basqarýdy jaqsartý qajettigi týraly saýal joldady, dep habarlaidy Ult.kz.
Depýtat óziniń saýalynda biýdjet tapshylyǵy men memlekettik qaryzdyń ósýine ákep soǵatyn, kirispen rastalmaǵan memlekettik shyǵystyń ulǵaiýy – memlekettik qarjynyń ózekti máselesiniń biri ekenin atap ótti.
Mákejanovtyń málimetinshe, sońǵy bes jylda memlekettik jiyntyq qaryz JIÓ ósý qarqynyna jaqyndaǵan jáne jylyna 12%-ǵa ulǵaiyp otyr. Osylaisha, alty aidyń ishinde 1,6 trln teńgege kóbeiip, 28,7 trln teńgege jetti.
«2014 jyldan bastap memlekettik qaryzǵa qyzmet kórsetýge arnalǵan shyǵystar 2024 jyldyń birinshi jarty jyldyǵynyń qorytyndysy boiynsha JIÓ-niń 0,6%-ynan 2,7%-ǵa deiin ósti, bul 4,5 esege ulǵaiýdy bildiredi. Odan basqa, 2025 jylǵa qaryzdy óteýge jáne olarǵa qyzmet kórsetýge 6,1 trln teńge bólý kózdelgen, bul Ulttyq qordan beriletin transfertterdi esepke almaǵanda respýblikalyq biýdjet kirisiniń 38%-yn quraidy», - dedi senator.
Depýtat sonymen qatar memlekettik qaryz ben qaryz alýdy basqarý memlekettik shyǵyndardyń turaqsyz ósýine ákelýi múmkin dep alańdaýshylyq bildirdi. Qaryzdyń JIÓ-ge qatynasy ázirge qolaily deńgeide qalsa da, senator memlekettik qaryzǵa qyzmet kórsetý shyǵynynyń ósýi jáne jańa qaryz alýdyń oryndylyǵy týraly alańdaýshylyq bildirdi. Depýtat osyǵan bailanysty Úkimetke olarǵa qyzmet kórsetýge jumsalatyn memlekettik shyǵystardyń qarqynyna monitoring pen baqylaýdy kúsheitýdi jáne jiyntyq memlekettik borysh pen kvazimemlekettik sektordyń boryshyn basqarýdyń naqty tujyrymdamasyn aiqyndaýdy usyndy.
«Qazirgi qaryzdardyń tiimdiligine monitoring jasaý men jańa qaryzdardyń oryndylyǵyn taldaýǵa, sondai-aq olardyń shyǵys qozǵalysyna baqylaýdy kúsheitý qajet. Qaryz alýǵa shekteýdiń jetkilikti ekendigi týraly máseleni qarastyrý jáne shartty túrdegi shekti mánderdi alyp tastaý qajet», - dedi Sultanbek Mákejanov.
