Foto: parlam.kz
Májilis depýtaty Jarqynbek Amantaiuly Pavlodar oblysynda "Maiqaiyń Altyn" AQ aýmaǵynda bolǵan apatqa qatysty Úkimet pen Bas prokýratýraǵa depýtattyq saýal joldady, - dep habarlaidy Sputnik Qazaqstan.
Eki apta buryn Pavlodar oblysy Baianaýyl aýdanynda "Maiqaiyń Altyn" AQ aýmaǵynda qutqarýshylar mingen avtobýs jer astyna túsip ketken bolatyn. Tórt adamnyń ekeýi qaza tapty, eki adam áli izdestirilip jatyr.
"Eń ókinishtisi, qulaǵan jerdiń astynda buryn shahta bolǵanyn eshkim eskertpegen. Tipti ústinen jol salǵan jáne sol joldy qyzmetkerler osy kúnge deiin paidalanyp kelgen. Al tehnikalyq qaýipsizdik sharalaryna sai ol jerdi qorshaýǵa alyp, qaýipti aimaq retinde oqshaýlap tastaýy kerek edi. Degenmen, bul - máseleniń basy ǵana", – deidi Jarqynbek Amantaiuly.
Aitýynsha, "Shanhai" atanyp ketken shaǵyn aýdannyń turǵyndary da alańdaýly. Olar shaǵyn aýdannyń asty da shahtaǵa ainalyp ketken deidi. Ken qazý barysyndaǵy jarylystardan úi irgesi solqyldap ketetinin aityp otyr. 100-ge jýyq shańyraq ornalasqan aýmaq qazirgi opyrylyp qulaǵan jerden nebári 500 metr qashyqtyqta ornalasqan.
"Búginde 10 myńǵa jýyq halyq turatyn Maiqaiyń eldi mekeniniń negizgi tirshilik kózi de osy ken oryndarynda. Tek "Maiqaiyń Altynda" myńnan astam jergilikti turǵyn eńbek etedi", – dep atap ótti májilismen.
"Maiqaiyń Altyn" resmi saityndaǵy málimetterge súiensek, kásiporyn qurylǵan ýaqyttan beri munda 16,7 mln tonna ken óndirilgen. Bul degenimiz – 80 tonna altyn, 1 240 tonna kúmis, 204 myń tonna mys, 300 myń tonna myrysh. 13 mln tonnadan astam ken kásiporynǵa qarasty ken baiytý fabrikasynda qaita óńdelgen.
"Sóite tura, "Maiqaiyń Altyn" óz qarjysyna kentte eshqashan turǵyn úi salmaǵan. Balalar alańy, sporttyq nemese áleýmettik nysandar turǵyzbaǵan. Tek jylyna jergilikti biýdjetke bardy-joqty alym-salyq tólep kelgen. Al, endi osy aktsionerlik qoǵamnyń 100 paiyz aktsiiasy Kipr Respýblikasynda ornalasqan "Rence Enterprises LTD" kompaniiasyna tiesili. Ol kompaniia Milan Popovich degen biznesmenge tiesili. Elimizdiń bailyǵyna kenelgen bul bai-patshalardyń isin kim qadaǵalaýǵa alady", – dep suraq qoidy depýtat.
Osyǵan bailanysty Jarqynbek Amantaiuly Úkimet pen Bas prokýratýraǵa birqatar usynys tastady:
• osy mańdaǵy shahtalyq jumys júrgizilgen barlyq aýmaqty anyqtap, olardy qaýipsizdik erejelerine sai oqshaýlaý;
• shahta mańynda ornalasqan shaǵyn aýyldyń turǵyndaryna qaýipsizdik jaǵdaiyn qarastyrý;
• elimizdiń bailyǵyn paidalanyp, biraq áleýmettik kómekti der kezinde kórsetpei otyrǵan sheteldik kompaniialarǵa zań júzinde qatań sharalar qoldaný.
Májilis depýtattary osy apatqa jáne tehnikalyq qaýipsizdiktiń saqtalmaýyna túrtki bolǵan jaǵdaiǵa prokýratýra ádiletti baǵasyn berýi kerek dep sanaidy.
