Búgin Úkimet otyrysynda elimizdiń batysyndaǵy 4 oblysty damytýdyń keshendi jospary qabyldandy, dep habarlaidy QazAqparat.
«Batys óńirlerdiń erekshelikteri men olardyń el ekonomikasynyń damýyna qosyp otyrǵan úlesin eskeretin bolsaq, atalǵan oblystardy áleýmettik-ekonomikalyq jaǵynan ári qarai damytý jáne turǵyndardyń ál-aýqatyn jaqsartý óte ózekti másele bolyp tabylady. Mańǵystaý jáne Atyraý oblystary boiynsha keshendi josparlar ótken jyly qabyldanǵan bolatyn. Olardy taǵy da bir pysyqtap, qosymsha qarjylandyrý qajet boldy. Al Aqtóbe jáne Batys Qazaqstan oblystaryna keletin bolsaq, óńir josparlary búgin birinshi ret bekitýge usynylyp otyr», - dedi Premer-Ministr Álihan Smaiylov.
Onyń atap ótýinshe, keshendi josparlar ekonomikanyń jekelegen salalaryn damytýǵa ǵana emes, sondai-aq sapaly sýmen qamtamasyz etý, bilim berý men densaýlyq saqtaýdyń qoljetimdi bolýy, jańa jumys oryndaryn qurý siiaqty mańyzdy máselelerdi sheshýge baǵyttalýy tiis.
«Máselen, Aqtóbe oblysynda ónerkásip kólemin 2025-shi jylǵa qarai 2,8 trln teńgege deiin arttyrý jáne qosymsha 39 myńnan astam jumys ornyn qurý josparlanyp otyr. Batys Qazaqstan oblysy boiynsha 2 myń shaqyrymnan astam elektr jelileri jańǵyrtylady, bul jelilerdiń tozýyn aitarlyqtai azaitatyn bolady. 38 myńnan astam jańa jumys orny qurylady. Shamamen 2,1 trln teńge jeke investitsiia tartý josparlanyp otyr. Atyraý oblysy boiynsha elektr jelilerinde jiilep ketken apattardy odan ári boldyrmaý úshin tiisti sharalar qabyldanady. 40 myńnan astam jańa jumys orny qurylady. Shamamen 8,3 trln teńge jeke investitsiia tartý josparlanyp otyr», - dedi ol.
Úkimet basshysynyń aitýynsha, Mańǵystaý oblysynda sý tapshylyǵyn eskere otyryp, sý tushytatyn 9 zaýyt pen qondyrǵyny salý jáne keńeitý kózdelip otyr. Sondai-aq 55 myńnan astam jumys ornyn qurý josparlanýda.
«Qujattarda negizinen biýdjetten tys qarajatty tartýǵa basymdyq berilip otyr jáne bul óte quptarlyq jait ekenin atap ótkim keledi. Eń bastysy óńir halqy oń ózgeristerdi barynsha sezinýleri kerek. Bolashaqqa senimmen qarap, jumys istep, tabys taýyp, ózderiniń biznesterin damytyp, jaqsy emdelip, sapaly bilim alýy tiis. Halyqtyń turmys sapasyn aitarlyqtai jaqsartý úshin barlyq múmkindikterdi paidalaný qajet. Qujattardy jalpy maquldaimyz. Ulttyq ekonomika ministrligine, ákimdikterge, múddeli memlekettik organdar men uiymdarǵa keshendi josparlardaǵy is-sharalardy ýaqytynda jáne sapaly iske asyrýdy qamtamasyz etýdi tapsyramyn», - dedi Álihan Smaiylov.
