Foto: Úkimet
Qazaqstannyń mashina jasaý salasy biyl 149 myń avtokólik shyǵaryp, óndiris kólemin 5%-ǵa arttyrady dep kútilýde, dep habarlaidy Ult.kz.
2024 jyly 134 myń birlik avtokólik óndirilgen bolatyn. Ósimge Almatydaǵy Astana Motors Manufacturing Kazakhstan zaýytynyń jumysy yqpal etti. Bul kásiporynda Chery, Haval jáne Changan markalarynyń kólikteri qurastyrylady. Jobaǵa 202 mlrd teńge investitsiia salynyp, jylyna 120 myń avtokólik óndirý jáne 3,6 myń jańa jumys ornyn qurý josparlanǵan.
Sonymen qatar, Qostanaida jylyna 70 myń avtokólik shyǵaratyn Kia Qazaqstan zaýytynyń qurylysy jalǵasýda. Zaýytqa quiylǵan investitsiia kólemi 90 mlrd teńgeni qurasa, jumysshylar sany 1,5 myńǵa jetpek. Bul joba óńirdiń avtomobil jasaý ortalyǵy retindegi pozitsiiasyn nyǵaitýǵa baǵyttalǵan.
Almatynyń indýstrialdy aimaǵynda Almaty Autoparts Production kásiporny iske qosylyp, jylyna 100 myńǵa deiin avtokreslo óndirýdi bastady. Ónimder Hyundai markaly kólikterine arnalǵan jáne bolashaqta jańa kásiporyndarǵa jetkiziledi.
Memleket mashina jasaý salasyn qoldaý maqsatynda investitsiialyq klasterlerdi damytý jumystaryn júrgizýde. 2023 jyly salaǵa 115 mlrd teńge investitsiia tartylsa, 2024 jyly bul kórsetkish 282 mlrd teńgege jetti. 2025 jyldyń birinshi toqsanynda 55 mlrd teńge investitsiia salyndy, bul 2024 jyldyń sáikes kezeńimen salystyrǵanda aitarlyqtai joǵary.
Mashina jasaý salasyn damytýdyń 2024-2028 jyldarǵa arnalǵan keshendi jospary aiasynda respýblikalyq biýdjetten 1,4 trln teńge jáne biýdjetten tys kózderden 1,3 trln teńge qarjylandyrý qarastyrylǵan. Bul jospar otandyq avtoónerkásiptiń ornyqty damýyn qamtamasyz etýge baǵyttalǵan.
