Elimizdiń 6 óńirinde balabaqshalar jumysyn toqtatty. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Nur-Sultan, Almaty, Shymkent qalalarynda, Túrkistan, Aqmola, Almaty oblystarynda balabaqshalar jumysyn toqtatty. Qalǵan óńirlerde balabaqshalar shtattyq rejimde jumys jasaýda. Alaida balabaqshalarǵa balalardy ata-analary óz erkimen aparýǵa múmkindigi bar. Aparmaǵan jaǵdaida balalardyń balabaqshadaǵy orny saqtalady», - dedi ol.
Ministrdiń dereginshe, qazirgi ýaqytta shtattyq rejimde jumys jasaityn balabaqshalarǵa tek 67 myń bala kelýde. Bul kórsetkish 11 paiyzdy quraidy.
«Bul jerde bilim basqarmalarynyń basshylaryna aitarymyz, jalpy balabaqshalarda múmkindiginshe az balalar jinalǵan kezekshi toptar jumys jasaýyn qamtamasyz etý qajet», - dedi Dáýren Abaev.
