Elimizdiń joǵary oqý oryndarynda arhiv isi boiynsha mamandyqtar ashý kerek. Bul týraly QR Prezidenti janyndaǵy Adam quqyqtary jónindegi komissiia otyrysynda Mádeniet jáne sport ministri Aqtoty Raiymqulova aitty, dep habarlaidy QazAqparat.
«Arhiv mekemelerin bilikti kadrlarmen qamtamasyz etý problemasy ózekti bolyp qalýda. Respýblika arhivterinde beiini boiynsha bilimi bar mamandardyń bar-joǵy 2,5 paiyzdy quraidy. Sonymen qatar ministrlikke elektrondyq qujat ainalymy jáne elektrondyq arhiv bóligindegi qyzmetterdi bergennen keiin tehnikalyq bilimi bar mamandar tapshylyǵy problemasy ótkir bolyp tur», - dedi ministr.
Onyń aitýynsha, keibir arhivterde jyl ishinde aýysymdylyq quramnyń 50 paiyzdan astamyn quraidy. Bul rette, memlekettik arhiv mekemeleriniń shtat sanynyń qysqarýyna qaramastan, saqtalatyn qujattar kóleminiń ulǵaiýy baiqalady.
«Arhiv salasynda bilikti kadrlardyń jetispeýshiliginiń basty sebebi - arhivshi mamandyqtary mártebesiniń tómendigi. Sondyqtan respýblikanyń joǵary oqý oryndary osy baǵyt boiynsha mamandar daiarlaýǵa múddeli emes. Mysaly, Ál-Farabi atyndaǵy Qazaq ulttyq ýniversiteti - «Arhiv-júrgizý», «Qujat-júrgizý» jáne «Qujattamalyq qamtamasyz etý» mamandyqtary boiynsha mamandar daiarlaýdy júzege asyratyn jalǵyz joǵary oqý orny. Sondyqtan óńirlerdiń joǵary oqý oryndarynda arhiv isi jáne qujattama salasy boiynsha mamandyqtar ashý, sondai-aq QR Bilim ministrligi «Arhivtaný», «Qujattaný» jáne «Qujattamalyq qamtamasyz etý» mamandyqtary boiynsha memlekettik granttardy ulǵaitý qajet», - dedi Aqtoty Raimqulova.
