Biyl Qazaqstan 63 jolaýshy vagonyn satyp alady. Bul týraly QR Indýstriia jáne infraqurylymdyq damý ministrligi resmi saýalǵa bergen jaýabynda aitty, dep habarlaidy QazAqparat.
Ministrliktiń deregine sensek, qazaqstandyq jolaýshylarǵa 2,6 myńnan astam vagon qyzmet kórsetedi. Alaida bul jaz mezgili men mereke, demalys kúnderinde jetkiliksiz. Osynyń saldarynan jaz saiyn jurt kóptegen baǵyttarǵa bilet tappai sarylady.
«Qazaqstandyq jolaýshy vagondarynyń parki 2,6 myńnan asady. Olardyń ortasha tozý deńgeii 45,9 paiyz shamasynda. Qoldaný merzimine bailanysty vagondardyń isten shyǵýyn, adamdar kóp júretin jaz mezgili men demalys, mereke kúnderinde vagon tapshylyǵy bolatynyn eskersek, jyl saiyn 200-ge jýyq jańa vagon qajet», - delingen resmi málimette.
Vedomstvonyń habarlaýynsha, osy qajettilikti óteý úshin kezeń-kezeńimen qaryzǵa vagon satyp alý josparlanyp otyr.
«Jyljymaly quramnyń parkin jańartý jónindegi is-sharalardyń kúrdeli salymdardy qajet etetinin eskere otyryp, vagondardy kezeń-kezeńimen qaryzǵa satyp alý jóninde memlekettik baǵdarlama ázirlengen. Bir jolaýshy vagonynyń baǵasy - 450 mln teńge», - delingen ministrlik jaýabynda.
Vedomstvonyń málimetine qaraǵanda, 2016-2018 jyldar aralyǵynda tasymaldaýshylar 240 jańa vagon satyp alǵan. Sondai-aq, aldaǵy ýaqytta 360 vagon satyp alý josparlanyp otyr. Onyń 63-i biyl jetkizilýi tiis.
