Foto: gov.kz
Qazaqstanda avtomobil joldarynyń sapasyn baqylaý úshin drondardy engizý josparlanyp otyr. Bul týraly Kólik ministrligi habarlady.
Qazirgi tańda joldardyń jai-kúiin baǵalaýǵa arnalǵan jańa býyn ushqyshsyz ushý apparaty synaqtan sátti ótti.
Synaq barysynda DJI Matrice 400 drony Aqmol – Vozdvijenka – Talapker baǵytyndaǵy oblystyq mańyzy bar avtojol ýchaskesinde qoldanyldy. Lazerlik lidar júiesimen jabdyqtalǵan qurylǵy jol tósemindegi aqaýlardy avtomatty túrde anyqtaýǵa múmkindik beredi.
Zamanaýi tehnologiialardyń arqasynda tekserý protsesi aitarlyqtai jedeldeidi. LiDAR jáne mmWave-radar kómegimen joldyń betki qabaty tolyq skanerlenip, tegis emes jerler men túrli zaqymdanýlar naqty ýaqyt rejiminde tirkeledi.
Derekterdi jinaý barynsha avtomattandyrylǵan: operator tek ushý aimaǵyn belgileidi, al dron marshrýtty ózdiginen qurastyryp, tekserýdi derbes júrgizedi. Sonymen qatar, qurylǵy qatty jel jaǵdailaryna beiimdelgen, bul Qazaqstannyń ashyq dala aimaqtary úshin erekshe mańyzdy.
Mamandardyń aitýynsha, mundai tehnologiialardy engizý jol qozǵalysy qaýipsizdigin arttyryp qana qoimai, jol sapasyn jaqsartýǵa tyń serpin beredi. Erte diagnostikanyń arqasynda aqaýlardy asqyndyrmai joiýǵa múmkindik týady.
Qazir bul júieni avtojoldardy keshendi diagnostikalaý quraly retinde keńinen engizý múmkindigi qarastyrylýda. Jańa tehnologiia aqaýlardy anyqtap qana qoimai, olardyń naqty kólemin dál baǵalaýǵa jol ashady.
