Qazaqstan aýmaǵynda oq-dári saqtaityn 44 nysannyń shekarasy aiqyndalady. Bul týraly QR Premer-Ministri Asqar Mamin depýtattyq saýalǵa bergen jaýabynda aitylǵan, dep habarlaidy QazAqparat.
«Qorǵanys ministrliginiń qoimalary men oq-dárileri bar arsenaldarynyń janynda aýmaǵynda tyiym salynǵan aimaqtar men aýdandar belgilengen jer ýchaskelerin memleket muqtajy úshin ielikten shyǵarý, sondai-aq oq-dárilerdi saqtaýdyń qazirgi zamanǵy qoimalaryn salý boiynsha júrgizilip jatqan jumysqa qatysty depýtattyq saýaldy qarap, mynany habarlaimyn. Qorǵanys ministrliginiń aqparaty boiynsha, Qarýly Kúshterdiń, basqa da áskerler men áskeri quralymdardyń arsenaldary, bazalary men qoimalary janyndaǵy tyiym salynǵan aimaqtar men aýdandardyń tizbesine sáikes (Qazaqstan Respýblikasy Úkimetiniń 2021 jylǵy 15 qańtardaǵy qaýlysy). № 9) Qarýly Kúshterde iri kalibrli oq-dárilerdi saqtaityn 44 nysannyń ainalasyndaǵy tyiym salynǵan aimaqtardyń (aýdandardyń) shekarasy aiqyndalýǵa jatady», - dedi Asqar Mamin depýtattyq saýalǵa bergen jaýabynda.
Onyń aitýynsha, nysandardyń ainalasyndaǵy tyiym salynǵan aimaqtardyń josparlary men shemalaryn Qorǵanys ministrligi tiisti ákimdikterge joldaýy kerek.
Osylaisha Jer kodeksiniń 16-babynyń 10-4-tarmaǵy boiynsha, qorǵanys jáne ulttyq qaýipsizdik úshin qajet jer ýchaskelerin berý jáne alyp qoiý oblystyń, respýblikalyq mańyzy bar qalanyń, astananyń jergilikti atqarýshy organynyń quzyretine jatady.
«Qazirgi ýaqytta 15 nysan boiynsha tyiym salynǵan aýdandardy belgileý qajettiligi joiyldy, óitkeni olardan iri kalibrli oq-dáriler shyǵaryldy. Qaraǵandy (4), Jambyl (4) jáne Aqtóbe (1) oblystarynda 9 nysan boiynsha kelisim bar, olar boiynsha tyiym salynǵan aimaqtar shegindegi jer ýchaskelerin ielikten shyǵarý úshin qarjy qarajaty talap etilmeidi. Qalǵan 20 nysan (Almaty (9), Shyǵys Qazaqstan (6), Mańǵystaý (2), Qaraǵandy (1), Túrkistan (1) oblystary men Shymkent qalasynda (1) ornalasqan. Úkimet máselelerdi keshendi jáne júieli sheshý boiynsha sharalar qabyldaýda. Óitkeni tyiym salynǵan aimaqtar men aýdandardyń áreketine iri eldi mekender, jeke menshik jáne basqa da múlik jatady», - delingen Úkimet bashysynyń jaýabynda.
