Elimizdegi eń jas kópbalaly batyr ana Jazira Turǵynovanyń otbasy baspanaly boldy. Búgin Túrkistan oblysynyń ákimi Janseiit Túimebaev jeti balaly januiaǵa turǵyn úidiń kiltin tabystady, dep habarlaidy "Ult aqparat".
Oblystyq ishki saiasat basqarmasynyń basshysy Beisen Tájibaev osyndai jańalyqty áleýmettik paraqshasyna jariia etti.
«Kúni keshe ǵana elordada - Elbasynyń aldynda aqtaryla sóilep, el razylyǵyna bólengen batyr ananyń ómiri jaqsylyqqa kúrt ózgerdi degen osy shyǵar. Al Astanadan - Shymkentke poezben shyqqan Jazira, sol sátten bastap atynyń shartarapty sharlap keterin de bilgen joq. Beisenbiniń túsinde temirjol vokzalynda antalai kútken tilshilerden tiksinip, tosyrqap júrgeni de sodan. Al búgin, qasietti jumada kieli Túrkistanda oblys basshysy Janseiit Túimebaevtyń qolynan baspananyń kiltin alǵan batyr ana, óń men tústiń ortasynda ǵajaiyp kúi keship tur» dep jazdy ol.
Basqarma basshysynyń málimetine qaraǵanda, tórt bólmeli páter Lenger qalasynan berilgen. Al otaǵasy Oljas Ábildabekov arnaiy oqytý kýrstan ótip, jumysqa ornalasady.
«Ainaldyrǵan úsh kúnde Jazira Turǵynovaǵa taǵdyrdyń keremet syiy tartylǵany anyq. Jeti balanyń nesibesin, adal júrekti ananyń tileýin Táńiri berdi» dep jazylǵan sóz sońynda.
Otbasy músheleri búgin tús aýa óz úilerine qonystanady dep kútilýde.
Aita keteiik, buǵan deiin elimizdegi eń jas kópbalaly ana Jazira Turǵynova Shymkenttiń irgesindegi Juldyz eldimekeninde páter jaldap turyp jatqany týraly jazǵan bolatynbyz. Jeti balany tárbielep otyrǵan erli-zaiyptylardyń turaqty jumystary joq ekeni de jetkizilgen.
