Búgin «Qaskeleń» agroparkinde bolǵan is-sharada alqabtaǵy astyq jinaý mashinasyn adamnyń qatysýynsyz basqarýǵa bolatyny týraly aityldy.
Atalǵan kombain John Deere S760 degen ataýǵa ie. Ol óz kezeginde «avtopilot» rejiminde dándi-daqyldardy jinap, arnaiy oilastyrylǵan baǵdarlamasy arqyly alqabtaǵy astyq jinaý mashinasyn adamnyń qatysýynsyz basqarady eken.
Aýyl sharýashylyǵynyń birinshi vitse-ministri Arman Evnievtiń aitýynsha, is-shara aýyl sharýashylyǵy ónimderin óndirýshilerge úzdik suryptardyń ónimdiligin arttyrý úshin ázirlengen jańa tehnologiialardy engizý nátijelerin kórsetýge múmkindik berdi. Olardyń ishinde No till – sýarylmaityn jerlerde qarqyndy ósimdikterdi egip ósirý tehnologiiasyn erekshe atap ótýge bolady.
Taǵy da aita ketetin jait, búgin Almaty oblysyna qarasty «Qaskeleń tájiribelik sharýshylyǵy» JShS bazasynda «Naqty egin sharýashylyǵyn júzege asyrý úshin innovatsiialyq agrotehnikalyq parki» pilottyq joba retinde quryldy. Onyń negizgi baǵyttary – júgeri, soia, jazdyq bidai, arpa jáne basqa da perspektivaly daqyldardy ósirý. Joba agroónerkásiptik keshendi tsifrlyq júiege kóshirý aiasynda iske asyryldy. Ol elektrondy sýarýdy engizý, drondardyń kómegimen jerdi qashyqtyqtan aldyn ala tekserý, robottandyrylǵan astyq jinaý jáne spýtnikpen bailanysty meteostantsiiaǵa deiin tyńaitqyshtardy avtomatty túrde engizý syndy baǵyttardy qamtidy.
Atalǵan sharaǵa QR AShM jáne «UAǴBO» KeAQ basshylyǵy, Almaty jáne Almaty oblysy ákimdikteriniń ókilderi men Germaniia, Shveitsariia, Frantsiia, AQSh jáne t.b. sheteldik agrarlyq kásiporyndardyń ókilderi qatysty.
Tsifrlyq tehnologiialardyń keńinen qoldaný birqatar tiimdilikterdi ákelgen. Máselen, jazdyq bidaidy dástúrli jáne innovatsiialyq tehnologiialar arqyly óndirý shyǵyndarynyń aiyrmashylyǵy birden baiqalady. Dástúrli tehnologiia kezinde taza paida 85 myń teńge/ga qurasa, innovatsiialyq tehnologiialardy paidalaný kezinde 232,5 myń teńge/ga deiin jetedi. Osyndai tájiribe basqa da daqyldarǵa, iaǵni jazdyq arpaǵa, júgeri gibridterine, soia túrlerine de júrgizilipti. Eń bastysy - innovatsiialyq tehnologiialardyń barlyq ekonomikalyq kórsetkishteri dástúrliden joǵary eken.
Aita keteiik, Aýyl sharýashylyǵy ministrligimen júzege asyrylyp jatqan jobalar bizneske qosymsha shyǵynsyz úzdik álemdik jetistikterdi paidalanýǵa múmkindik beredi. Sonymen qatar, jańa tehnologiialar otandyq bizneske ekonomikalyq shyǵyndaryn aitarlyqtai tómendetip, ónimdilikti joǵarylatýǵa áser etedi.
