QR Parlamenti Májilisiniń depýtaty Berik Ábdiǵaliuly saiasi qýǵyn-súrgin qurbandaryn aqtaý baǵytynda arhivterdegi jabyq qorlardy ashý mańyzdy ekenin aitty, dep habarlaidy QazAqparat.
«Búginde negizgi jumys arhivterdiń jabyq qorlarynda júrgizilýi kerek. Bul baǵytta ǵalymdar kedergilerge tap bolyp otyr. Komissiianyń arqasynda ruqsat qaǵazdaryn alǵanymen, áli de bizdiń vedomstvolardyń arhivterinde kedergiler bar. Sondyqtan osyny sheshýdiń basty joly – ol qupiiasyzdandyrý. Óitkeni kóptegen qujattar keńestik kezeńde qupiialyqqa bekitilgen», - dedi depýtat Ortalyq kommýnikatsiialar qyzmetinde.
Berik Ábdiǵaliulynyń aitýynsha, qazirgi kezde Reseide, Ýkrainada jáne burynǵy keńestik basqa da elderde keibir qujattar ǵalamtorda, kitaptarda jariialanyp jatyr. Al Qazaqstanda bul qajattar áli de qupiia kúiinde saqtalyp otyr.
«Qazirgi kezde mekemelermen kelisip, Bas prokýratýra, Joǵarǵy sot, Ishki ister ministrligi, Ulttyq qaýipsizdik komitetimen birlesip, arnaiy komissiialardy uiymdastyryp, birtindep kezeń-kezeńmen qupiiasyzdandyrý júrgizý kerek. Bul tek ǵalymdar úshin emes, óz babalaryn izdep júrgen azamattarǵa da tanysýǵa jeńil bolar edi. Memlekettik komissiiasynyń sheshimimen osyndai arnaiy komissiia quryldy. Onda búkil tiisti ókiletti organdardyń músheleri bar. Endi josparyn jasap, jumysymyzdy bastaimyz. Óitkeni búginde óńirlerde júmystar júrgizilip jatyr, degenmen oblystyq arhivterde jabyq qorlar bar. Olar birtindep qazir ashylyp jatyr», - dedi depýtat.
Onyń sózine qaraǵanda, tek Ishki ister ministrliginiń ózinde 172 myń qujat pen is boiynsha jabyq qor bar.
