Ishki naryqta álemdik baǵa ósiminiń áserin azaitý maqsatynda ishki naryqty otandyq taýarlarmen tolyqtyrý jumysy júrip jatyr. Bul týraly Úkimet otyrysynda QR Saýda jáne integratsiia ministri Baqyt Sultanov aitty, dep habarlaidy "Ult aqparat".
«Baǵany turaqtandyrý sheńberinde múddeli memlekettik organdar jedel sharalardy qoldanýda. Mysaly, jumyrtqa men kúnbaǵys maiyna shekti baǵa engizildi. Osyndai ákimshilik shara qoldanýǵa májbúr boldyq. Turaqtandyrý qorlarynda 7,1 mlrd teńge somasynda 57 myń tonna azyq-túlik qalyptastyrylyp jatyr. Ainalym shemasy aiasynda jeńildetilgen nesiege 28 mlrd teńge bólindi. Jaqyn arada taǵy 4 mlrd teńge bólý kózdelip otyr. Onyń 3,7 mlrd teńgesine 36 myń tonna azyq-túlik qoryn satyp alý týraly kelisimshart jasaldy», - deidi Baqyt Sultanov.
Onyń aitýynsha, ishki naryqta álemdik baǵa ósiminiń áserin azaitý maqsatynda ishki naryqty otandyq taýarlarmen tolyqtyrý jumysy júrip jatyr.
«Saýda jáne integratsiia, Aýyl sharýashylyǵy, Qarjy ministrlikteri jergilikti atqarýshy organdarmen birlesip, áleýmettik mańyzy bar taýarlardyń naqty túrleri men kólemin bekitedi», - deidi ol.
