QR Aýyl sharýashylyǵy ministrliginiń jer reformasy komissiiasynyń ekinshi otyrysynda ekonomikalyq jumys tobynyń jetekshisi Aqylbek Kúrishbaev jumys toby otyrysynyń nátijeleri týraly aitty, dep habarlaidy QazAqparat.
«Ekonomikalyq máseleler boiynsha jumys tobynyń otyrysynda 6 másele qaraldy. Otyrysqa jumys tobynyń 33 múshesiniń 30-y qatysty. Qazirgi ýaqytta eń ózekti máseleniń biri – jer resýrstaryn baqylaý boiynsha biryńǵai memlekettik júie qurý. Qazirgi ýaqytta QR aýyl sharýashylyǵy ministrliginiń jer resýrstaryn basqaratyn komitetinde tek ortalyq apparat qalǵan. Ol jerde 38 adam jumys isteidi. Barlyq aimaqtyq jer inspektsiialary 2014 jyly ákimdikterdiń quzyryna berilgen. Iaǵni, ákim ózi jer beredi, jerdi ózi baqylaidy. Osyǵan bailanysty birinshi qaraǵan máselemiz - ákimdikterden (jergilikti atqarýshy organdardan) jerdiń paidalanylýy men qorǵalýyn memlekettik baqylaý jáne «Azamattarǵa arnalǵan úkimet» memlekettik korporatsiiasyna memlekettik jer kadastryn júrgizý fýnktsiialaryn bere otyryp, jer resýrstaryn basqarý agenttigin qurý», - deidi ekonomikalyq jumys tobynyń basshysy Aqylbek Kúrishbaev.
Onyń aitýynsha, bul usynysty otyrysqa qatysqan jumys tobynyń 30 múshesiniń 27-i qoldady. Qarsy bolǵandar sany – 3 adam.
«Qarsy bolǵan tulǵalar bul printsipke qarsy bolǵan joq. Olar agenttik qurmai, jer resýrstaryn basqarý komiteti óz mekemesin quryp, aýyl sharýashylyǵy minsitrliginiń quzyrynda qala berýdi qoldady. Atalǵan máselelerdi sheshýdiń birden bir joly – ol salany tolyqtai tsifrlyq platformaǵa kóshirý. Kópshiliktiń basym daýys berýimen jer resýrstaryn basqarý agenttigin qurý týraly usynys qabyldandy», - deidi ol.
