Elimizde volonterlik qyzmetti qoldaý standarty ázirlenedi. Bul týraly Úkimet otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«El Prezidentiniń bastamasymen qolǵa alynǵan volenterlik qozǵalys búginde jalpyhalyqtyq qoldaýǵa ie bolǵan jobaǵa ainaldy. Ásirese, byltyrǵy pandemiia kezinde halyqtyń shynaiy qaiyrymdylyq qasieti men elge degen jeke jaýapkershiligi erekshe bilindi. Osy 1 jyldyń ishinde volonterlik qyzmettiń qarqyny artyp, baǵdarlamalar men jobalardyń aýqymy aitarlyqtai keńeie tústi. Atap aitqanda, volonterlik uiymdardyń sany 3 esege, eriktiler qatary 4 esege kóbeidi. Pandemiia kezinde 500 myńǵa jýyq azamat volonterlik qyzmetke qatysyp, 1 mln-nan astam janǵa naqty kómek kórsetildi. 80 myńnan astam azyq-túlik sebeti, 4,5 mln meditsinalyq jabdyq taratyldy», - dedi ministr.
Onyń atap ótýinshe, osy qalyptasqan aýqymdy múmkindikter men adami resýrsty saqtai otyryp, Volonterlikti damytýdyń jol kartasy aiasynda eriktiler qozǵalysyn qoldaý biyl da óz jalǵasyn taýyp jatyr.
«Bul Nur Otan partiiasynyń da sailaýaldy baǵdarlamasynda kórsetilgen basymdyqtardyń biri. Jol kartasynyń keshendi is-sharalar toptasy aiasynda birqatar baǵyt aiqyndaldy. Atap aitqanda, birinshi – zańnamalyq deńgeide ózgerister engizý. Onyń aiasynda oqýǵa tapsyrý men jumysqa ornalasý kezinde jeńildikter qarastyrý, volonterlerdiń quqyǵy men mindetterin keńeitý, eriktilerdiń eń tómengi jas shegin belgileý jáne korporativtik volonterlik normalary siiaqty jańashyldyqtar da qarastyrylǵan. Jariia talqylaýdan ótken soń zań jobasy 1-shildege deiin Úkimet qaraýyna engiziletin bolady. Buǵan qosa, volonterlik qyzmetti qoldaý standarty ázirlenip, onyń negizinde memlekettk organdarǵa osy baǵyt boiynsha tiisti baǵyt-baǵdar beriletin bolady», - dedi Aida Balaeva.
Ministrdiń aitýynsha, ekinshi – volonterlik infraqurylym.
«Volonterler qurǵan respýblikalyq jáne 17 óńirlik front-keńseler óz jumysyn jalǵastyrýda. Biylǵy jyldyń 1-jartyjyldyǵynda 113 myńnan astam volonterdiń qatysýymen 6 myńǵa jýyq is-shara ótkizildi. Úshinshi – volonterlik jobalar men bastamalardy iske asyrý. Jol kartasy aiasynda jalpy somasy 528,3 mln teńgeni quraityn 40-tan astam jobany iske asyrý qarastyrylǵan. Aqparat ministrligi tarapynan 13 volonterlik jobaǵa 438,6 mln teńge bólinip otyr. Onyń aiasynda janýarlarǵa janashyrlyqty kózdeitin «Birge aiala», aǵa urpaqty volonterlik qyzmetke shaqyratyn «Kúmis» volonterlik jobalary, sonymen qatar basqa da ózekti taqyryptar boiynsha 130-dan astam shaǵyn granttar qarastyrylǵan», - dedi ol.
