Bas memlekettik sanitariialyq dáriger Jandarbek Bekshin elimizdegi Buqaralyq aqparat quraldaryna úndeý tastady, dep habarlaidy "Ult aqparat".
«Konstitýtsiia bárine birdei. Barlyǵynyń pikirine qulaq asýymyz kerek. Halyqtyń da, jýrnalisterdiń de, ǵalymdardyń sózin tyńdaǵan jón. Biz bolmasaq, halyqaralyq tájiribeni halyqqa kim aitady? Ustazdarymnyń biri Afrika elderiniń birinde meditsinalyq kómek berýmen ainalysty. Sol maǵan: «Aýrý tarap ketken kezde bir túnde 9 bala shetinedi. Sonda óli balasyn qushaqtap turyp, qaiǵydan júzderi tas bop qatyp qalǵan analardy kórdim. Ol elde soǵys bolyp jatyr edi. Men sonda «vaktsinatsiia tiimsiz» degen sózdi aitqan adamdy syrtqa shyǵaryp atyp tastaýǵa daiyn boldym» degen áńgime aitty. Kórdińiz be? Sondyqtan, bizdiń bárimiz aýrýdyń aldyn alýǵa, vaktsinatsiianyń qajet ekenin halyqqa eskertýimiz kerek. Qatty da bolsa shyndyqty aityp turmyn», - dedi Jandarbek Bekshin OKQ-da ótken baspasóz máslihatynda.
Bas memlekettik sanitariialyq dáriger aqshanyń sońyna túsip, halyqqa durys aqparat bermei jatqandardy synady.
«Biz halyqtyń densaýlyǵyn oilaýymyz kerek. Eń birinshi kezekte, jýrnalisterden suraimyn! Sebebi antivaktsional lobbii óte kúshti bolyp tur. Kórip otyrsyzdar, qandai stsenariiler jazylyp jatyr. Ol úshin aqsha tólenip jatqany anyq qoi. Tipti antivaktsionaldy nasihatqa kásibi akterlar qatysýda. Bári de aýtizm jaily aitady. Kezinde AQSh-tyń jalǵan ǵalymy Endiý Ýikfildtiń eńbegin Tehas soty joqqa shyǵaryp, dáriger sertifikatyn aiyrdy. Al sony nasihattaǵan ǵylymi basylymnyń redaktory keshirim surady. Ol jerde aýtizmge qatysty eshteńe bolmaǵan. Bul – tek syltaý edi», - dedi Jandarbek Bekshin.
Eske sala ketsek, buǵan deiin Jandarbek Bekshin ekpe jasalmaǵan balalar balabaqshalarǵa kirgizilmeitinin málim etken edi.
