Qazaqstanda tótenshe jaǵdai rejimi kezeńine memlekettik áleýmettik kómektiń kólemi artty. Bul jóninde QR Eńbek jáne halyqty áleýmettik qorǵaý minitsrligine silteme jasap "Ult aqparat" habarlaidy.
Memleket basshysynyń tapsyrmasy boiynsha QR Eńbek jáne halyqty áleýmettik qorǵaý ministrligi tótenshe jaǵdai kezeńine azyq-túlik pen turmystyq jiyntyǵyn alýshylardyń tizimin keńeitti.
Áleýmettik-eńbek salasyndaǵy jekelegen memlekettik qyzmetter kórsetý erejelerine jáne tótenshe jaǵdai kezeńinde halyqtyń jekelegen sanattary úshin azyq-túlik pen turmystyq jiyntyqtarymen qamtamasyz etý qaǵidalaryna Qazaqstan Respýblikasy Eńbek jáne halyqty áleýmettik qorǵaý ministriniń Buiryǵymen tiisti ózgerister engizildi.
Atap aitqanda, joǵaryda atalǵan tizimge barlyq jastaǵy III toptaǵy múgedekter men jumyssyz azamattar qosymsha engizildi.
Endi azyq-túlik pen turmystyq jiyntyqtardy azamattardyń kelesi sanattary alatyn bolady:
– ataýly áleýmettik kómek alýshylar qatarynan 6 jastan 18 jasqa deiingi balalar;
– meditsinalyq-áleýmettik mekemelerde turaqty turatyn múgedekterdi qospaǵanda, 16 jasqa deiingi múgedek balalar;
– meditsinalyq-áleýmettik mekemelerde turaqty turatyn múgedekterdi qospaǵanda, barlyq jastaǵy I, II, III toptaǵy múgedekter;
– múgedek balany tárbieleýshi;
– jumyspen qamtý máseleleri boiynsha jergilikti organda tirkelgen jumyssyz azamattar.
Búgingi tańda tótenshe jaǵdai rejimi engizilgen sátten bastap shamamen 180 myń adam azyq-túlik jáne turmystyq jinaqtarmen qamtamasyz etilgen.
Osy kómek túrin alýshylardyń tizimin jergilikti atqarýshy organdar jasaidy.
Sonymen qatar, Qazaqstanda TJ rejimin engizýge bailanysty tikelei qarym-qatynasty boldyrmaý maqsatynda ataýly áleýmettik kómek alýshylarǵa járdemaqy taǵaiyndaýdy avtomatty túrde uzartady. Al birinshi ret ótinish bildirgen jaǵdaida ýchaskelik komissiia bailanys qurylǵylary arqyly tekserý júrgizedi. Qyzmet kórsetý nátijesi týraly aqparatty azamat poshta nemese messendjer arqyly alady.
Sondai-aq buiryqta tótenshe jaǵdai kezeńinde meditsinalyq-áleýmettik saraptamadan ótý «Elektrondyq úkimet» portaly arqyly júzege asyrylatyny kórsetilgen.
Túzetýlerge sáikes, eger qaita tekserý merzimi bir ai ishinde nemese tótenshe jaǵdai kezeńinde tússe, onda múgedektikti nemese eńbek etý qabiletinen aiyrylý dárejesin belgileý merzimi tótenshe jaǵdai rejimi kezeńine avtomatty túrde uzartylady.
Bul rette tótenshe jaǵdai kezeńinde múgedektigi boiynsha járdemaqy tóleý buryn belgilengen top jáne jalpy eńbek etý qabiletinen airylý dárejesi boiynsha júzege asyrylady.
