Sý sharýashylyǵy infraqurylymynyń túrli memlekettik organdardyń qaraýynda bolýy salada tiimdi saiasat júrgizýdi qiyndatady. Bul týraly Parlament Májilisiniń tóraǵasy Erlan Qoshanov málim etti, dep habarlaidy QazAqparat.
«Qazirgi kezde sý aǵyndary men sý aidyndarynyń rejimin zerdeleý úshin nebári 310 gidrologiialyq beket jumys isteidi. Jalpy, mundai beketter 800-den asýy qajet. Tolyqqandy memlekettik sý kadastry joq deýge bolady. Osynyń bári sý resýrstarynyń sandyq jáne sapalyq jai-kúiine monitoring júrgizýdi, ekonomika salalarynyń sýmen qamtamasyz etilýi boiynsha anyq teńgerimniń bolýyn qiyndatady», - dedi Qoshanov Májilistegi parlamenttik tyńdaý barysynda.
Sonymen qatar ol sý paidalaný salasyndaǵy vedomstvoaralyq úilestirý máselesine toqtaldy.
«Sý sharýashylyǵy infraqurylymy ártúrli memlekettik organdardyń qaraýynda. Bul sý resýrstaryna qatysty tiimdi saiasat júrgizýdi qiyndatady. Máselen, sýmen jabdyqtaý kózderi (jerasty, jerústi) men toptyq sýtartqyshtarǵa Ekologiia, geologiia jáne tabiǵi resýrstar ministrligi jaýap beredi. Eldi mekenderdi sýmen jabdyqtaýdy damytýǵa Indýstriia jáne infraqurylymdyq damý ministrligi jaýapty. Josparlaý, salý jáne odan ári paidalaný jergilikti atqarýshy organdardyń quzyrynda. Aýdandar men aýyldyq okrýgterdiń ákimdikteri arasyndaǵy basqarýdyń júiesizdigi biryńǵai tehnikalyq, kadrlyq, tariftik saiasattyń bolmaýyna alyp keledi», - dedi Májilis tóraǵasy.
Budan buryn habarlanǵandai, 2040 jylǵa qarai Qazaqstanda sý tutyný 46 paiyzǵa artady.
«Ishki sý saiasaty kúshti bolmasa, kórshi eldermen tiimdi sý diplomatiiasyn jolǵa qoiý múmkin emes. Qazaqstan aýmaǵynyń sýmen qamtamasyz etilýi ózen aǵysy boiynsha joǵary ornalasqan kórshi memleketterdiń sý saiasatyna bailanysty. Sondyqtan transshekaralyq nysandardy birlesip paidalanýǵa, memleketaralyq sý qatynastaryn jetildirýge ekologiialyq qana emes, ulttyq qaýipsizdikti qamtamasyz etýdiń mańyzdy sharttarynyń biri retinde qaraǵan jón. Kórshi eldermen ózara tiimdi yntymaqtastyq ornatý Qazaqstannyń sý qaýipsizdigin qamtamasyz etýdegi negizgi faktor bolýy tiis», - dedi Májilis tóraǵasy.
