Búginde tegin meditsinalyq kómek aiasynda xalyqqa aqysyz beriletin dári-dármekter jekemenshik dárixanalarda satylady. QR Densaýlyq saqtaý ministrligi Farmatsiia komitetiniń tóraiymy Liýdmila Biýrabekova mundai zań buzýshylyqtardyń qalaisha jasalatynyn aityp berdi, dep habarlaidy QazAqparat.
"Shyny kerek, tegin meditsinalyq kómektiń kepildendirilgen kólemine kiretin preparattar jekemenshik dárixanalarda satylady. Ondai faktiler bar. Endi, taýar óndirýshi kompaniialar men distribiýtorlar ózara uryspai-aq qoiaiyq dep, bizge eshteńe aitpaidy. Degenmen, bizge túsken málimetter boiynsha, tegin dárilerdi jasyryn satýǵa shyǵaryp jatady", - dedi L.Biýrabekova.
Onyń aitýynsha, qazirgi kezde retsepter elektrondy túrde beriledi. Aýrýxanadan ondai retsepter birden dárixanaǵa túsedi. Alaida kei kezde naýqastar dárixanaǵa barmai qoiady, ia bolmasa, preparattyń markasyn unatpai, almai ketedi. "Sol siiaqty sebepter kóp. Alaida dárixanaǵa retsept túsip tur ǵoi. Olar preparatty berildi dep esep jasaidy da, myna jaqtan ózderi sata salady", - dep atap kórsetti L.Biýrabekova.
Aita keteiik, búgin QR Premer-Ministriniń orynbasary Erbolat Dosaev xalyqty dári-dármekpen qamtamasyz etý salasyndaǵy buzýshylyqtardy atady. Úkimet basshysynyń orynbasary sáýir aiynyń aiaǵyna deiin barlyq oblystarda reviziia ótkizýdi tapsyrdy. Densaýlyq saqtaý ministri Eljan Birtanov ta osy máselege qatysty óz pikirin bildirdi.
