Foto: Pixabay.com
Ǵylym jáne joǵary bilim ministrligi barlyǵy 8000-nan astam qosymsha grant qarastyrylǵanyn málim etti. Máselen "Qazaqstan halqyna" qoǵamdyq qory 2024-2025 oqý jylyna arnalǵan bilim granttary baǵdarlamasyn jalǵastyryp jatyr. Biyl áleýmettik osal toptaǵy taǵy 850 talapker qor granty boiynsha joǵary bilim alýǵa qol jetkize alady.
Vedomstvo málimetinshe, 3 000-ǵa deiin grant qaita bólinedi. Sonymen qatar 870 jumys berýshilerden grant beriledi.
Ministrlik ókilderi qosymsha mynadai bilim berý granttaryn atap ótti
- 800 Túrkistandaǵy Halyqaralyq Týrizm jáne qonaqjailylyq ýniversitetiniń granttary;
- Rektorlyq granttar;
- 2 475 jergilikti atqarýshy organdardyń granttary;
- 850 "Qazaqstan halqyna" qorynyń granttary;
- 500 Q.A.Iassaýi atyndaǵy Halyqaralyq qazaq-túrik ýniversitetinde oqý úshin Túrkiia Respýblikasynan beriletin grant;
Sonymen qatar vedomstvodaǵylar sessiia qorytyndysy boiynsha bos granttar alý múmkindigi baryn jetkizdi.
"Qazaqstan halqyna" qorynyń resmi saityndaǵy málimetine súiensek, 2022 jyldan beri baǵdarlamanyń arqasynda 2,6 myńnan astam stýdent bilim alyp jatyr. Al 2023-2024 oqý jylynda qordyń oqýǵa jáne shákirtaqyǵa tólegen tólemderi 2,6 mlrd teńgeni quraǵan.
Bilim grantyna:
- Kúndizgi oqý nysanynda oqýdyń barlyq kezeńine "bakalavr" dárejesin berý kezinde joǵary bilim alý úshin jylyna 1 million teńgeden aspaityn mólsherde tegin tólem.
- Jazǵy demalysty qospaǵanda, tamaqtandyrý, turý jáne oqý ádebietin satyp alý shyǵyndaryn ishinara jabý úshin jylyna 10 aiǵa 40 myń teńge kóleminde ai saiynǵy shákirtaqy kiredi.
Qor málimetinshe, 2022 jyldan bastap baǵdarlamaǵa 93 joǵary jáne joǵary oqý ornynan keiingi bilim berý uiymy (JBO) qatysyp keledi.
Bilim berý granttary joǵary bilimi bar kadrlardy daiarlaýǵa memlekettik bilim berý tapsyrystaryn ornalastyratyn joǵary oqý oryndarynyń tizbesine engizilgen joǵary oqý oryndarynyń kúndizgi oqý nysanyndaǵy bakalavriat baǵdarlamasy boiynsha beriledi.
Ótinish berýshilerdi tańdaý kriteriileri:
- 1) aýyldyq jerdegi, shaǵyn jáne monoqalalardaǵy az qamtylǵan otbasylardan;
- 2) jetim balalar nemese kámeletke tolǵanǵa deiin ata-anasynyń qamqorlyǵynsyz qalǵandar;
- 3) múgedektigi bar;
- 4) múgedek balalardy tárbielep otyrǵan otbasylardan;
- 5) 2022 jylǵy qańtardaǵy qaiǵyly oqiǵalar kezinde qaitys bolǵan Qazaqstan Respýblikasy azamattarynyń balalary;
- 6) 2022 jylǵy qańtardaǵy qaiǵyly oqiǵalar kezinde jaralanǵan balalar.
Sonymen qatar úmitkerlerdiń jasy 29 jastan aspaýy kerek. Bilim berý granty jeke taǵaiyndalady, aýdarylmaidy jáne akkredittelgen ýniversitetterde kúndizgi bólimde oqý úshin bir ret beriledi. Memlekettik bilim grantyn alǵan tulǵalar "Qazaqstan halqyna" qorynyń grantyna qujat tapsyra almaidy. Grantty ekinshi dárejeli nemese onlain bilim alý úshin paidalanýǵa bolmaidy.
"Bilim berý grantyn berý óz qalaýy boiynsha jáne úlgermeýi boiynsha oqýdan shyǵarylǵan jaǵdailarda, sondai-aq stýdent oqýdyń ekinshi jylyna qaldyrylǵan jáne bilim berý granty ielenýshisiniń baǵdarlamaǵa qatysýshylarǵa tiesiligin rastaityn durys emes aqparat jáne/nemese dáieksiz qujattar usynylǵan jaǵdaida toqtatylady.
"Qazaqstan halqyna" qory atalǵan talaptarǵa sai azamattaryn joǵary oqý oryndarynyń qabyldaý komissiialaryna habarlasýǵa shaqyrady. Ótinimderdi qabyldaýdyń sońǵy merzimi – 17 tamyz", - delingen qor habarlamasynda.
