Elimizde damýyna basym baǵyt beretin sport túrleriniń tizimi jasaldy. Bul týraly QR Mádeniet jáne sport ministrligi sport jáne dene shynyqtyrý isteri komitetiniń tóraǵasy Samat Erǵaliev málim etti, dep habarlaidy QazAqparat.
«Jetken jetistikti de, kemshilikti de jasyrýǵa bolmaityn salanyń biri – sport. Onyń nátijesi BAQ-ta keńinen sóz bolyp, qoǵam talqysyna túsedi. Ózderińiz biletindei, jaqynda 2 mańyzdy halyqaralyq sport oqiǵasy ótti. Ol - Tokioda ótken jazǵy Olimpiada jáne Beijińdegi qysqy Olimpiada oiyndary. Qazaqstan quramasynyń atalǵan oiyndarda kórsetken nátijesi oidaǵydai bolmady. Sonymen qatar, Memleket basshysynyń tapsyrmasy boiynsha biyl aqpan, naýryz ailarynda 6 óńirdiń jumysyna taldaý jasalyp, birqatar ózekti máseleler anyqtaldy», - dedi Samat Erǵaliev ortalyq kommýnikatsiialar qyzmetinde ótken baspasóz máslihatynda.
Onyń aitýynsha, elimizde akkredittelgen 179 sport túri bar jáne atalǵan salada birqatar reforma qolǵa alynǵan.
«Saralaý boiynsha onyń barlyǵyna memleket biýdjetinen qarjy qarastyrylǵan. Alaida sport túrleriniń bárin birdei tolyqqandy damytý múmkin emes. Sondyqtan, sońǵy 10 jyl ishinde ótken Olimpiada, Aziia oiyndaryndaǵy ulttyq qurama komandalardyń jetistikterin eskere otyryp, ministrlik basym sport túrleriniń tizimin anyqtady», - deidi ol.
Osylaisha, atalǵan vedomstvo 15 sport túrine basym baǵyt berip otyr.
Ol - boks, aýyr jáne jeńil atletika, júzý, velosport, dziýdo, áielder kúresi, grek-rim kúresi, erkin kúres, taekvondo, biatlon, mánerlep syrǵanaý, fristail jáne shańǵy jarysy.
«Degenmen osy 15 sport túriniń ishinde tek 6-7 sport túrleri Olimpiada jáne álem chempionattarynda jaqsy nátijege qol jetkizip júr. Joǵaryda atalǵan sport túrleri boiynsha aldaǵy ýaqytta óńirlerdiń jumysyn baǵalaý júiesi ázirlenedi. Sport ǵalymdary men bilikti mamandardy osy sport túrlerin damytýǵa jumyldyramyz», - deidi komitet basshysy.
