Importty almastyrýdyń 2025 jylǵa deiingi baǵdarlamasy osy jyldyń maýsymynda bekitiledi. Bul týraly búgin Úkimet otyrysynda QR Indýstriia jáne infraqurylymdyq damý ministri Qaiyrbek Óskenbaev aitty, dep habarlaidy QazAqparat.
«Kásiporyndardyń ainalasynda shaǵyn jáne orta biznes beldeýin qurý maqsatynda Qyzylorda oblysynyń ákimdigimen birlese otyryp, «Orda-Glass» JShS shyny zaýyty bazasynda avtomobil shynylary, shyny talshyqtary, shynydan jasalǵan ydystar, ydys-aiaq, tereze shynylary men smartfondarǵa arnalǵan juqa shynylar óndiretin shaǵyn zaýyttar sala otyryp, shynydan daiyndalatyn buiymdar óndirisin pysyqtai bastadyq», - dedi ol.
Ministrdiń aitýynsha, jumys istep turǵan kásiporyndar men jańa jobalarǵa da qatysty osyndai tásilder qoldanylady. Iri júie quraýshy kásiporyndardy qoldaý, sondai-aq shaǵyn jáne orta kásipkerlerge infraqurylym usyný esebinen buryn importtalǵan taýarlar oqshaýlanatyn bolady.
«Baǵdarlama (Importty almastyrýdyń 2025 jylǵa deiingi baǵdarlamasy) jobasyn ázirleý jumystary naqty keste boiynsha júrgizilýde. Algoritmge sáikes naýryz aiynda álemdik tájiribeni taldap, barlyq óńdeý ónerkásibi boiynsha keshendi saraptama júrgizdik. Sáýirde jobalar pýlyn jasap, is-qimyl algoritmin ázirledik. Mamyr aiynda qujatty múddeli memlekettik organdarmen jáne uiymdarmen kelisý rásimin aiaqtaýdy josparlap otyrmyz. Maýsymda joba bekitiletin bolady. Óńirlik baǵdarlamalar jergilikti atqarýshy organdarmen qyrkúiek aiyna deiin qabyldanady», - dedi Qaiyrbek Óskenbaev.
