Qazirgi kezde elimizde shomylýǵa ruqsat etilgen 497 oryn bekitilgen. Bul týraly QR Tótenshe jaǵdailar ministrliginiń Azamattyq qorǵanys jáne áskeri bólimder komitetiniń tóraǵasy Baýyrjan Syzdyqov aitty, dep habarlaidy QazAqparat.
«1 maýsymnan elimizde sýda shomylý kezeńi bastaldy. Sý qoimalarynda qaýipsizdikti qamtamasyz etý maqsatynda Tótenshe jaǵdailar ministrligi quzyrly vedomstvolar jáne ákimdiktermen birlesip keshendi aldyn alý jumystaryn uiymdastyryp, iske asyryp jatyr. Qazirgi kezde elimizde shomylýǵa ruqsat etilgen 497 (2021 jyly - 538) oryn bekitilgen. Onyń ishinde 142-si kommýnaldyq, 341-i jeke jaǵajai retinde tirkeldi. Munymen qosa, 14 oryn boiynsha naqty ielerin bekitý jumystary júrgizilip jatyr (ShQO – 10, BQO-4)», - dedi B. Syzdyqov.
Osy oraida ol elimizde adamdar shomylýǵa nemese demalýǵa baratyn sý qoimalary, ózender men kólderdegi oryndar 50 myńnan asatynyn aitty. Alaida bul jerler qaýipsizdik talaptaryna sai jasaqtalmaǵan.
«Halyq eń kóp paidalanatyn 125 sý qoimasynda Tótenshe jaǵdailar ministrliginiń 493 qutqarýshysy táýlik boiy kezekshilik atqaryp jatyr. Biyl baqylaýdy kúsheitý jáne azamattardyń qaýipsizdigin qamtamasyz etý maqsatynda shomylý maýsymy bastalysymen qaýipti jáne kúzetilmeitin aýmaqtarda Ministrliktiń qosymsha 55 jyljymaly qutqarý beketi jumysyn kiristi», - dedi vedomstvo ókili.
Onyń sózine qaraǵanda, zardap shekkenderge alǵashqy meditsinalyq kómek kórsetý úshin kommýnaldyq jáne jeke jaǵajailarda 162 meditsinalyq pýnkt jumys istep jatyr. Qalǵandarynda meditsina qyzmetkerleri qutqarý pýnktiniń quramynda kezekshilik etedi.
