QR Premer-Ministri Asqar Mamin «Qazaqstan Aselsan injiniring» JShS qorǵanys ónerkásibi kásipornyna bardy. Kásiporyn pandemiia jaǵdaiynda ókpeni jasandy jeldetý (ÓJJ) statsionarlyq apparattarynyń óndirisin uiymdastyrǵan, dep habarlaidy "Ult aqparat" Premer-ministrdiń baspasóz qyzmetine silteme jasap.
Bul apparat emdeý mekemelerinde jansaqtaý jáne qarqyndy terapiia bólimderinde eresekter men balalardyń ókpesin uzaq ýaqyt boiy jeldetýge arnalǵan. ÓJJ apparaty QR Densaýlyq saqtaý ministrliginiń talaptaryna sai keledi jáne Nur-Sultan qalasyndaǵy Kópsalaly juqpaly aýrýlar ortalyǵynda sátti synaqtan ótip, meditsina mamandarynyń oń saraptamalyq qorytyndysyn alǵan.
Búgingi tańda jergiliktendirý deńgeiin 30%-ǵa deiin jetkizýmen, ony 50% jáne odan da kóp paiyzǵa ulǵaitý perspektivasymen ÓJJ apparattaryn óndiristik qurastyrý júzege asyrylýda.
Óndiristik tsikl kezeńinde jergiliktendirý deńgeii «Qazaqstan Aselsan injiniring» JShS-nyń zamanaýi tehnologiialyq jabdyqtarmen jabdyqtalýynyń jáne elektrondy, radioelektrondy jáne optikalyq priborlar salasyndaǵy injenerlik-tehnikalyq personaldyń quzyretiniń joǵarylyǵynyń arqasynda artatyn bolady. ÓJJ apparattary óndirisine QR basqa da qorǵanys salasy kásiporyndarynyń tehnologiialyq áleýeti tartylǵan.
Densaýlyq saqtaý ministrliginiń jóneltýge ruqsaty boiynsha ÓJJ apparattary biyl qyrkúiek-qazan ailarynda elimizdiń barlyq óńirleri boiynsha meditsina mekemelerine 1500 dana kóleminde jetkiziletin bolady.
ÓJJ apparattaryn qurastyrýmen qatar, kásiporynnyń injenerlik-tehnikalyq personaly emdeý mekemelerindegi meditsina qyzmetkerleriniń oqytylýyn qamtamasyz etedi, sondai-aq 24/7 rejiminde tehnikalyq qoldaýdy júzege asyrady. Kásiporyndarǵa 3 jyl boiy kepildikti qyzmet kórsetý merzimi usynylady.
Úkimet basshysy óndirispen tanysyp, elimizdiń meditsina mekemelerine ónimderdi ýaqytyly jetkizýdi qamtamasyz etýdi tapsyrdy.
«Qazaqstan Aselsan injiniring» JShS óndiristik alańyn aralaýǵa Premer-Ministrdiń orynbasary R. Skliar, indýstriia jáne infraqurylymdyq damý ministri B. Atamqulov, densaýlyq saqtaý ministri A. Tsoi jáne Nur-Sultan qalasynyń ákimi A. Kólginov qatysty.
