Monitoring toptarynyń jumys algoritmine ózgerister engizildi. Bul týraly Qazaqstan kásipkerleriniń quqyqtaryn qorǵaý jónindegi ýákil Rústem Júrsinov málim etti, dep habarlaidy "Ult aqparat".
«7 jeltoqsanda koronavirýs infektsiiasynyń taralýyna jol bermeý jónindegi vedomstvoaralyq komissiia monitoring top jumysynyń algoritmin bekitken bolatyn. Degenmen monitoring toptary quramynyń ashyqtyǵy, tekserýler úshin negizder jáne olardy biznes nysandarynda júrgizý tártibine qatysty birqatar másele ashyq kúiinde qalǵan edi. Biz bul olqylyqtardyń ornyn toltyrýdy usyndyq. Keshe, 19 jeltoqsanda, Úkimet jańartylǵan algoritmdi usyndy», - dep jazdy Rústem Júrsinov Facebook paraqshasynda.
Rústem Júrsinov buryn monitoring toptarynyń nazaryn tek eń óreskel tártipbuzýshylyqtarǵa aýdarý týraly usynys aitqanyn jazady. Jańa algoritmde bul usynys eskerilgen, monitoring toptaryna biznesti tek 5 talaptyń saqtalýy turǵysynan tekserý uiǵarylǵan. Olar:
1) jumys rejimi;
2) adamdar kóp jinalatyn is-sharalardy ótkizýden bas tartý;
3) áleýmettik qashyqtyqty saqtamaý;
4) maska rejimin saqtamaý;
5) kelýshiler sanynyń limitten asýy.
«Eger monitoring toby osy 5 tártipbuzýshylyqtyń bireýin anyqtasa, ol kásipkerge aiyppul sala almaidy. Materialdar sanitarlyq dárigerdiń tekserýinsiz ákimshilik is júrgizý úshin SEQ-qa jiberiledi nemese shuǵyl habarlama jasalady. Al SEQ inspektory kásipkerdi tekseredi. Ekinshi jaǵdaida sanitarlyq dáriger biznes nysanyn tekserý paraǵynda qarastyrylǵan talaptardyń saqtalýyn tekseredi (qazirgi ýaqytta 24 talap bar, biraq jaqyn arada ony 20-ǵa deiin qysqartý josparlanýda)», -deidi ol.
Rústem Júrsinov sonymen qatar engizilgen taǵy bir mańyzdy jańalyq - endi ákimdikter monitoring toptaryn tekserýge shyqpas buryn olardyń derbes quramyn óz saittarynda jariialaýǵa, al monitoring toptarynyń músheleri bar bolǵan jaǵdaida qyzmettik kýálikterin kórsetýge mindetti bolatynyn atap ótti. Osylaisha, kásipkerler ózderin tekserýge zańdy baqylaý toby kelgenin bile alady.
Sondai-aq algoritmge reidtik is-sharalar júzege asyrylatyn aýmaqtyń ýchaskesin monitoring tobynyń aldyn ala aiqyndap alýy týraly usynys engizilgen. Bul monitoring toptarynyń jumysyn tsifrlyq baqylaýǵa negiz boldy. Tsifrlyq monitoring olardyń qyzmetiniń ashyqtyǵyn arttyryp, sybailas jemqorlyq táýekelderin tómendetedi. Ázirge tsifrlyq monitoring pilottyq rejimde tek Túrkistan oblysynda ǵana júrgizilýde. Bul tájiribe búkil elge taratylýy múmkin
«Eger sizge nemese sizdiń biznesińizge qatysty monitoring tobynyń músheleri zańǵa qaishy áreket jasaǵan bolsa, 1432 qysqa nómiri boiynsha UKP call center-ge habarlasyńyz», - deidi Rústem Júrsinov.
