Aýyl sharýashylyǵy ministrligi mal sharýashylyǵy shikizatyn óndirý men qaita óńdeýdiń kólemi týraly biylǵy 7 aidyń derekterin jariialady, dep habarlaidy "Ult aqparat" ministrliktiń baspasóz qyzmetine silteme jasap.
Ministrlik Qazaqstanda shujyq, et konservileri, mal men qus etiniń óndirisi turaqty túrde ósip kele jatqanyn habarlaidy. Jańa qaita óńdeý kásiporyndarynyń iske qosylýy, tiri mal eksportynyń shektelýi jáne qus sharýashylyǵynda et baǵytyndaǵy memlekettik qoldaýdyń keńeiýi osy ónimderdiń óndirisiniń artýyna yqpal etken.
«Qańtar men shilde ailarynda mal men qustyń barlyq túrleriniń eti ótken jyldyń sáikes kezeńimen salystyrǵanda 4%-ǵa (soiys salmaǵynda 590 myń tonna), siyr súti 3%-ǵa (3,6 mln tonna) artyq óndirildi. Al taýyq jumyrtqasynyń óndirisi 4,9%-ǵa, iaǵni, 3,1 mln danaǵa deiin azaidy. Shujyq ónimderin óndirý 21,5%-ǵa (27 358 tonnadan 33 234 tonnaǵa deiin), qyshqyl sút ónimderi 4,7%-ǵa (123 300 tonnadan 129 106 tonnaǵa deiin), sary mai 8%-ǵa (11 158 tonnadan 12 051 tonnaǵa deiin), irimshik pen súzbe 1,9%-ǵa (17 778 tonnadan 18 120 tonnaǵa deiin), balmuzdaq 1,6%-ǵa (21 118 tonnadan 21 455 tonnaǵa deiin), óńdelgen sút 0,2%-ǵa (332 040-tan 332 576 tonnaǵa deiin), et konservileri 4,3%-ǵa (4 298-den 4 481 tonnaǵa deiin) ulǵaidy», - dep habarlaidy ministrlik.
Aita keterligi, Qazaqstanda qus eti 24 qus fabrikasynda óndiriledi. Kún saiyn olar 800 tonnadan astam ónim shyǵarady. Jyl sońyna deiin 300 myń tonnaǵa jýyq et beredi. 2019-jyly respýblikada 223 myń tonna qus eti óndirildi. Al, 2018-jyly bul kórsetkish 192 myń tonnany quraǵan edi.
