QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin avtokólikti tirkeý men qaita tirkeýdi elektrondy formatta júrgizýdiń tiimdiligin aitty, dep habarlaidy QazAqparat.
«Elimizde tanymal platformalar men servister arqyly qyzmetterdi kórsetý boiynsha jumystar júrgizildi. Máselen, Kaspi.kz, Homebank qosymshasy arqyly kólikti tirkeýge toqtalsaq, bul óz kezeginde protsesti ońtailandyrýǵa ári avtomattandyrýǵa eleýli serpin berdi, sondai-aq azamattardyń ýaqyty men shyǵynyn únemdeýge jol ashty. Osy turǵyda avtokólikti satyp alýshyǵa da, satýshyǵa da ótinim berý úshin halyqqa qyzmet kórsetý ortalyǵyna barýdyń qajeti joq. Bul qadamdar karantindik is-sharalar baǵytynda erekshe mańyzdy», - dedi B. Mýsin Májilistegi Úkimet saǵatynda.
Onyń aitýynsha, biylǵy qańtar aiynda avtokólikti tirkeý men qaita tirkeý boiynsha 104 myń tranzaktsiia bolyp, onyń ishinde onlain rejimde tek 5 paiyzy qamtyldy. Al qańtar aiynyń qorytyndysy boiynsha 167 tranzaktsiia tirkelip, onyń ishinde onlain-rásimdeý 36 paiyzǵa deiin artty.
«Osy arqyly tanymal platformalarǵa qyzmetterdi aýystyrý óziniń nátijesin berip jatqanyn kórip otyrmyz. Bul rette eń tanymal, suranysy joǵary qyzmetterdi qamtyp jatyrmyz. Nege avtokólikti qaita tirkeýdi qamtydyq? Sebebi mamandandyrylǵan halyqqa qyzmet kórsetý ortalyqtarynda atalǵan qyzmetke qatysty irkilis bolǵandyqtan,osy baǵytty ońtailandyrýǵa mán berdik», - dedi ministr.
