2021 jylǵy 1 qańtardan bastap elimizde qylmystyq protsestiń úsh býyndy modeli engiziledi, dep habarlaidy "Ult aqparat".
Biyl, 1 qyrkúiekte Memleket basshysy Qasym-Jomart Toqaev «Jańa jaǵdaidaǵy Qazaqstan: is-qimyl kezeńi» atty Qazaqstan halqyna joldaýynda zańnamanyń jekelegen aspektilerin jetildirýge baǵyttalǵan birqatar tapsyrma bergen edi. Al 20 jeltoqsanda «Qazaqstan Respýblikasynyń keibir zańnamalyq aktilerine qylmystyq protseste azamattardyń quqyqtaryn qorǵaýdy kúsheitý jáne sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» Zańnyń qabyldanýy atalǵan tapsyrmalardy iske asyrýdyń nátijesi sanalady.
QR Ishki ister ministrliginiń málimetinshe, kelesi jyldyń basynda kúshine enetin Zań memlekettik qyzmetshiler, depýtattar, sýdialar úshin sheteldik bankilerde shottardy ielenýge, onda qolma-qol aqshalai qarajatty jáne baǵaly zattardy saqtaýǵa shekteý engizedi. Quqyq qorǵaý organdary qyzmetkerleriniń, sýdialardyń, para berýshilerdiń jáne para berýde deldal bolǵandardyń sybailas jemqorlyq úshin jaýapkershiligin qatańdatady. Al memlekettik qyzmetshilerde nemese kvazimemlekettik uiymdardyń basshylarynda qos azamattyqtyń bolýy olardy atqaryp otyrǵan laýazymnan bosatý úshin negizge ainalady.
«2021 jylǵy 1 qańtardan bastap qylmystyq protsestiń úsh býyndy modeli engiziledi. Ókilettikterdiń naqty ajyratylýy onyń erejeleriniń biri bolyp sanalady. Endi prokýror qylmystyq protseske qatysýshylardyń konstitýtsiialyq quqyqtaryn qozǵaityn negizgi protsestik sheshimderdi kelisetin bolady. Memleket basshysynyń qoly qoiylatyn «Qazaqstan Respýblikasynyń keibir zańnamalyq aktilerine Prezidenttiń «Jańa jaǵdaidaǵy Qazaqstan: is-qimyl kezeńi» atty 2020 jylǵy 1 qyrkúiektegi Joldaýynyń jekelegen erejelerin iske asyrý máselesi boiynsha ózgerister men tolyqtyrýlar engizý týraly» Zań jobasy ulttyq zańnamaǵa engiziletin ózgeristerdiń taǵy bir keshenin qamtidy«, - dep atap ótedi ministrlikten.
Atalǵan zań jobasy aiasynda kámeletke tolmaǵandarǵa qarsy jasalatyn jynystyq qylmystarǵa jaýapkershilik qatańdatylady. Sondai-aq bul sanatqa jatatyn qylmystardyń sany kóbeitiledi. «Pedofilderdi» barynsha qaýipsiz mekemelerde ustaý kózdeledi. Olardy merzimnen buryn bosatý múmkindigi joiylady.
Atalǵan Zań jobasynyń qabyldanýy sondai-aq «Bas bostandyǵynan aiyrý oryndarynan bosatylǵan adamdardy ákimshilik qadaǵalaý týraly» Zańyna ózgerister engizedi. Osylaisha kámeletke tolmaǵandarǵa qarsy jynystyq qylmystyq boiynsha jazasyn ótegen adamdardy ákimshilik qadaǵalaý merzimi sottylyqty óteý merzimine deiin arttyrylatyn bolady.
