Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly karantin jaǵdaiyndaǵy Qurban ait týraly baspasóz máslihatyn ótkizip jatyr, dep habarlaidy "Ult aqparat".
«Barshańyzdy kúlli isi musylman balasy asyǵa kútetin ulyq meiram – Qurban aitpen shyn júrekten quttyqtaimyn! Aittaryńyz qabyl bolsyn! Sizderge Alladan amandyq, myqty saýlyq, mol yrys pen baq-bereke tileimin!», - dedi Naýryzbai qajy Taǵanuly Ortalyq kommýnikatsiialar qyzmetinde ótken baspasóz máslihatynda.
Bas múftidiń aitýynsha, islam dininde zulhijja aiynyń alǵashqy 10 kúni qasietti kúnder sanalady. Hijri jyl sanaýy boiynsha 1442 jyldyń zulhijja aiy 11 shilde kúni bastaldy. Al arapa kúni 19 shildege sáikes keledi. 20 shilde – Qurban ait merekesiniń birinshi kúni.
«Biylǵy 20 shilde kúni respýblika aýmaǵynda tańǵy saǵat 7.00-de qatań sanitarlyq norma talaptaryn saqtai otyryp, «sary», «jasyl» aimaqtarda 10 minýttyq Qurban ait namazy oqylady. Degenmen, «qyzyl» aimaqta Qurban ait namazyn oqý jergilikti sanitarlyq memlekettik bas dárigerdiń Qaýlysyna sáikes júzege asyrylady.
Osy oraida, Qurban ait namazyn ótkizý boiynsha QMDB-nyń ókil imamdary jergilikti bas sanitarlyq dárigerlermen birlesip, arnaiy brifingter ótkizetin bolady. Jamaǵattan qaýipsizdik sharalaryn qatań saqtaýdy, ait namazy bitken sátte meshit aýlasynda uzaq turaqtamaýdy suraimyz», - deidi Bas múfti.
