QR Úkimetiniń bastamasymen ázirlengen árbir zań jobasynyń aldynda jurtshylyqpen keńesýge arnalǵan Konsýltativtik qujat bolady. Bul týraly QR Ádilet vitse-ministri Natalia Pan aitty, dep habarlaidy QazAqparat.
2021 jylǵy 12 naýryzdaǵy «Qazaqstan Respýblikasynyń keibir zańnamalyq aktilerine normashyǵarmashylyqty jetildirý máseleleri boiynsha ózgerister men tolyqtyrýlar engizý týraly» Zańy zańdardy qabyldaýdyń neǵurlym ashyq tetigin kózdeidi. Endi Úkimettiń bastamasymen ázirlengen árbir zań jobasynyń aldynda jurtshylyqpen konsýltatsiialar ótkizýge arnalǵan Konsýltativtik qujat bolady. Mundai qujat salanyń problemasyn neǵurlym tereń qalyptastyrýǵa jáne kórýge, olardy sheshýdiń ádisteri men tásilderin pysyqtaýǵa múmkindik beredi»,- dedi vitse-ministr Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, memlekettik organdar problemany anyqtaǵan kezde tiisti taldaý júrgizýge jáne onyń nátijelerin Konsýltativtik qujatta kórsetýge tiis. Budan ári Konsýltativtik qujat jurtshylyqpen jáne onyń naqty nysanaly toptarymen konsýltatsiialar ótkizý úshin «Ashyq NQA» portalynda jariialanady. Jurtshylyqpen talqylaýlar «Ashyq NQA» portalynda talqylaý, jariia tyńdaýlar men pikirtalastar syndy bir nemese birneshe tásilderdi paidalana otyryp júrgiziledi.
«Qoǵammen talqylanǵannan keiin ǵana memlekettik organ talqylanatyn máseleni sheshý úshin zań ázirleýdiń oryndylyǵy týraly sheshim qabyldaidy. Osylaisha, halyq zańnamalyq bastamanyń eń erte kezeńinen bastap ýákiletti organdar qabyldaǵan sheshimderge tartylatyn bolady», - dedi Natalia Pan.
