2021 jyly memlekettik áleýmettik saqtandyrý qorynan 1 jasqa deiingi bala kútimi úshin 385 myń otbasyǵa áleýmettik tólem taǵaiyndaldy. Onyń 3,5 myńǵa jýyǵy – er adamdar. Bul týraly qordyń bas direktory Nursulý Kemel aitty, dep habarlaidy Halyq Uni portaly.
Onyń aitýynsha, 1 jasqa deiingi bala kútimine bailanysty mindetti áleýmettik saqtandyrý júiesiniń qatysýshysyna, iaǵni bala kútimimen ainalysatyn ata-anaǵa áleýmettik tólem taǵaiyndalady.
«Ol ákesi nemese anasy bolýy múmkin. Muny ata-analar ózderi aqyldasyp sheshedi. Bul tólem bala kútimimen naqty ainalysatyn ata-ananyń birine beriledi. Mysaly, otbasynda bala dúniege kelip, oǵan ákesi qarasa, ol buryn jumys istese, onyń áleýmettik tólemdi alýǵa múmkindigi bar», - dedi Nursulý Kemel OKQ-de baspasóz máslihatynda.
Bas direktor byltyr qansha otbasy atalǵan áleýmettik tólemdi alǵanyna toqtaldy.
«Byltyr 385 myń otbasyǵa 1 jasqa deiingi bala kútimi úshin áleýmettik tólem taǵaiyndaldy. Onyń 3,5 myńǵa jýyǵy er adamdar. Olar bala kútimimen ainalysamyn, tabysymnan aiyryldym, 1 jyl bala qaraimyn, tiisti demalysymdy rásimdeimin dep sheshim qabyldady. Biz olarǵa shekteý qoiǵan joqpyz. Oǵan dálel retinde byltyr ákelerge taiyndalǵan 3 myńnan asa áleýmettik tólemdi aitýǵa bolady. 2021 jyly onyń ortasha mólsheri 38 myń teńge boldy», - dedi Memlekettik áleýmettik saqtandyrý qorynyń basshysy.
Nursulý Kemeldiń aitýynsha, biyl 6 aida bala kútimine bailanysty eńbek demalysyna shyqqan 60 myńǵa jýyq otbasyǵa áleýmettik tólem taǵaiyndalǵan. Biylǵy tólemniń ortasha mólsheri – 46 myń teńge.
