Foto: Úkimet saity
Bul bastama Úkimette vitse-premer Serik Jumanǵarinniń tóraǵalyǵymen talqylanǵan, dep habarlaidy Úkimettiń baspasóz qyzmeti.
Aldyn ala boljam boiynsha, tehnoqala ozyq tehnologiia, ǵylym, ýniversitetter men biznes shoǵyrlanatyn erekshe mártebesi bar qala bolmaq. Negizgi maqsaty — basty nazar qoldanbaly áser men kommertsiialyq qaitarymyna aýdarylatyn, qysqa merzimde óndiristegi ǵylymdy qajet etetin ázirlemelerdi jasap, engizý. Bul rette jańa energetika men energiia únemdeýge, biotehnologiia men azyq-túlik qaýipsizdigine, jańa aqparattyq tehnologiialar jáne JI-di damytýǵa mán beriledi.
Tehnoqalany júzege asyrýdyń birinshi kezeńinde Almaty oblysynyń aýmaǵynda Almatyǵa jaqyn jerde 500 ga alańda ornalastyrý usynylady. Oryn "Innovatsiialyq tehnologiialar parki" men "Alataý" AEA, iadrolyq fizika institýtynyń janynda ornalasýy eskerile otyryp tańdaldy. Aýmaqtyń shamamen 30%-y ýniversitetterge, ǴZI-ǵa jáne tehnoparkke bólinip, olar kadr daiarlaý men jańa ázirlemeler jasaýǵa negiz bolmaq.
Tujyrymdamany daiyndaý sheńberinde halyqaralyq tájiribe zertteldi. Mysaly, Japoniiada "Sýkýba" tehnopolisi Tokiodan 56 shaqyrym jerde ornalasqan. Onda 45-ten astam joǵary tehnologiialyq kompaniia bar. Ǵylymi súiemeldeýdi 20 memlekettik jáne 40 korporativtik institýt, 2 ýniversitet, 13 myńnan astam zertteýshi júrgizedi. Munda ǵaryshtyq tehnologiia, meditsina, biotehnologiia men materialtaný salasy ázirlemeleri júrgiziledi. QHR-da Beijiń mańynda Z-Park joǵary tehnologiialar erekshe aimaǵy jumys isteidi. 488 shaqyrym aýmaqta 23 myńǵa jýyq kompaniia bar. Bir millionǵa jýyq adam jumys isteidi. Kadr daiarlaý Beijiń Tsinhýa ýniversitetinde júrgiziledi. Ǵylymi qoldaýdy 200 institýt qamtamasyz etedi. Munda aqparattyq tehnologiia, jasandy intellekt; zattar interneti, elektronika, biomeditsina, intellektýaldy óndiris jáne basqa da salalar damytylady.
