Qazaqstanda sońǵy 5 jylda iri qara mal basy 23,3 paiyzǵa ósti. Bul týraly Aýyl sharýashylyǵy ministri Saparhan Omarov málim etti, dep habarlaidy QazAqparat.
«2019 jyly et óndirý kólemi (soiys salmaǵynda) 5,8 paiyzǵa ulǵaiyp, 1,1 mln tonnany qurady. Et óndirisiniń ulǵaiýy aýyl sharýashylyǵy janýarlary sanynyń ósýine bailanysty boldy. Sońǵy 5 jylda iri qara mal basy 23,3 paiyzǵa ósip, 7,4 mln basty qurady, usaq mal 6,6 paiyzǵa artyp, 19,1 mln basty, jylqy 45,8 paiyzǵa artyp, 2,8 mln basty qurady», - dedi ministri Parlament Májilisindegi Úkimet saǵatynda.
Onyń sózine qaraǵanda, salanyń qurylymy da ózgerýde. 2014 jyly uiymdastyrylǵan sharýashylyqtardaǵy iri qara mal basynyń úlesi 35,1 paiyz bolsa, qazir 44,9 paiyzdy qurady.
«Jalpy, et boiynsha qamtamasyz etý kólemi 85 paiyzdy qurady. Bul rette «qyzyl et» (siyr eti, qoi eti, jylqy eti jáne shoshqa eti) boiynsha import úlesi jalpy tutyný kóleminiń 5%-ynan aspaidy. Óńdeýge tek muzdatylǵan et ǵana ákelinedi.
Qus eti buǵan kirmeidi, ol boiynsha ishki tutynýdaǵy import úlesi 44,7%-dy quraidy. Atap aitqanda, FAO (BUU-nyń Azyq-túlik jáne aýyl sharýashylyǵy uiymy) synyptamasy boiynsha tutynym 80 paiyzǵa otandyq óndiris esebinen qamtamasyz etilgen jaǵdaida ǵana azyq-túlik qaýipsizdigi qamtamasyz etiledi», - dedi Saparhan Omarov.
