Qazaqstanda ekologiialyq máselelerdi sheshýge arnalǵan jol kartasy ázirlendi. Ol 17 baǵyttan turady. Bul týraly QR Ekologiia, geologiia jáne tabiǵi resýrstar ministrligi Ekologiialyq retteý jáne baqylaý komitetiniń tóraǵasy Zulfuhar Joldasov málim etti, dep habarlaidy QazAqparat.
«Bizdiń ministrlik «Halyq únine qulaq asatyn memleket» tujyrymdamasy aiasynda ekologiialyq problemalardy qoǵammen, ásirese ekobelsendilermen birlesip sheshý jolyn qarastyrdy. Jurtshylyqpen talqylaý nátijesinde ákimdik jáne basqa da quzyrly organdarmen birlesip ekologiialyq problemalardy sheshýdiń 17 jol kartasy ázirlendi. Onyń aiasynda barlyǵy 485 is-shara qarastyrylǵan. Biyl sonyń 95-in ótkizý josparlanyp otyr. Biylǵy jyldyń 1 toqsanynda 70 is-shara ótkizý josparlanyp, onyń 42-si oryndaldy jáne 28 is-shara endi qolǵa alynady», - dedi Joldasov OKQ-de ótken baspasóz máslihatynda.
Onyń aitýynsha, atalǵan jol kartasy óz nátijesin 2025 jylǵa qarai bere bastaidy.
«Ekologiialyq problemalardy sheshý jol kartasyn iske asyrý 2025 jylǵa qarai elimizdegi 10 qala atmosferasynyń lastaný indeksin joǵary deńgeiden ortasha deńgeige deiin tómendetýge múmkindik beredi. Sol arqyly iri qalalar aýasynyń jai-kúii jaqsara túsedi. Odan bólek, qatty turmystyq qaldyqtarǵa arnalǵan 7 jáne 24 jańa poligon salý josparymyz bar. Sol siiaqty 12 qatty turmystyq qaldyq poligony qaita jańǵyrtylady», - deidi ol.
