Qorshaǵan ortaǵa shyǵarylǵan emissiia úshin jylyna ortasha eseppen Qazaqstanda 60-70 mlrd teńge salyq jinalady. QR Ekologiia, geologiia jáne tabiǵi resýrstar ministrligi jańa ekologiialyq kodeks arqyly bul qarajatty ekologiialyq máselelerdi sheshýge baǵyttaýdy kózdeýde, dep habarlaidy QazAqparat.
«Jańa ekologiialyq kodekstiń jańashyldyqtarynyń birine toqtalaiyn: qazirgi ýaqytta jergilikti biýdjetterge qorshaǵan ortaǵa shyǵarylǵan emissiia úshin ortasha eseppen 60-70 mlrd teńge salyq jinalady. Ekologiialyq kodekstiń jobasy osy qarajatty aimaqtardy eskere otyryp, ekologiialyq máselelerdi sheshýdi kózdeidi. Qazirgi tańda joǵaryda atalǵan somanyń bar bolǵany 10 paiyzy ekologiialyq qajettilikke jumsalyp keledi», - dedi OKQ-da ótken baspasóz máslihatynda QR Ekologiia, geologiia jáne tabiǵi resýrstar vitse-ministri Ahmetjan Pirimqulov.
Vitse-ministr sonymen birge, jańa kodeks arqyly ekologiialyq normalaý júiesin jetildirmek. Iaǵni, kezeń-kezeńmen qorshaǵan orta normativteriniń sapasyn jaqsartý josparlanǵan.
«Búgingi kúni bárimiz Densaýlyq saqtaý ministrligi bekitken shekti kontsentratsiiany paidalanymyz. Bul shekti kontsentratsiia tek adam densaýlyǵyna áseri turǵysynan ǵana esepke alynady. Demek, kásiporynnyń búkil qorshaǵan ortaǵa tigizetin yqpaly eskerile bermeidi. Qorshaǵan orta sapasynyń normativteri tolyǵymen belgili bir kásiporynnyń halyq densaýlyǵyna da tigizetin áserin esepke alady», - dedi Ahmetjan Pirimqulov.
Onyń aitýynsha, ekologiialyq tártipti buzǵandar úshin ákimshilik aiyppul mólsheri ósedi.
«Ortasha eseppen ekologiialyq buzýshylyq úshin salynatyn ákimshilik aiyppul qazirgimen salystyrǵanda 10 ese ósedi», - dedi ol.
Eske sala ketsek, buǵan deiin Ahmetjan Pirimqulov jeltoqsan aiynda Parlamentke engiziletin jańa ekologiialyq kodeks jobasy qoldanystaǵy zańnamaǵa birqatar ózgeris engizýdi kózdeitinin habarlaǵan edi.
