Ishki ister ministrliginiń ókilderi «Qarý» jedel aldyn alý sharasynyń aiasynda 328 atys qarýyn tárkiledi, dep habarlaidy QazAqparat.
17 mamyrdan bastap respýblikalyq aýqymda qolǵa alynǵan sharanyń maqsaty – qarýmen jasalatyn qylmystardyń aldyn alý, zańsyz ainalymnan qarý men oq-dárilerdi anyqtaý jáne tárkileý, azamattyq jáne qyzmettik qarý ainalymyn baqylaý.
«Jedel aldyn alý is-sharasy kezinde politsiia organdary zańsyz ainalymnan 328-den astam atys qarýyn tárkiledi. Onyń ishinde 212 dana tegis uńǵyly qarý, 38 dana gazdy qarý, 9 qoldan jasalǵan qarý, 27 travmatikalyq qarý, 18 elektrlik qarý alyndy. Qarýdy zańsyz saqtaǵany jáne alyp júrgeni úshin QR QK 287-baby boiynsha 134 material tirkeldi», - dedi Nurdildá Oraz.
Ministrdiń keńesshisi qarýdy zańsyz saqtaǵany jáne alyp júrgeni úshin 195 azamat Ákimshilik quqyq buzý kodeksiniń 482-baby boiynsha ákimshilik jaýapkershilikke tartylǵanyn da aitty.
«Budan basqa, 994 zańdy tulǵa tekserildi. Onyń ishinde qarý-jaraq saýdasyna mamandanǵan 72 dúken, 9782 fermerlik jáne sharýa qojalyq jáne 84490 azamattyq qarý ieleri tekserildi. Tekserý nátijesinde 3196 tártip buzý faktisi anyqtaldy. Onyń 2404-i qarýdy saqtaý jáne alyp júrý erejelerin buzsa, 792-si qarýdy tirkeý jáne qaita tirkeý tártibin buzǵany úshin jaýapkershilikke tartyldy», - dedi ministrlik ókili.
