Videodan skrinshot
Qazaqstanda taǵy bir dron fakýlteti ashylady. Bul kelisimge indýstriia jáne qurylys ministrligi delegatsiiasynyń Ońtústik Koreiaǵa sapary kezinde qol jetkizildi, dep habarlaidy "Ult aqparat" 24kz arnasyna sálteme jasap.
3 kún ishinde qonaqtar Koreia úkimetiniń múshelerimen, iri kompaniialardyń basshylarymen kelissózder júrgizip, Djei jáne Shinhan ýniversitetterinde boldy. Onda olar lektsiialarǵa qatysyp, ushqyshsyz ushaqtardy jasaý úshin injenerlerdi oqytý úderisimen tanysty.
Indýstriia jáne qurylys ministrliginiń málimetinshe, ázirge Qazaqstanda eki ýniversitette ǵana ushqyshsyz ushý kafedrasy bar. Endi bireýi Djei ýniversitetiniń kómegimen ashylady. Koreialyq professorlar Qazaqstanda ushqyshsyz ushaqtar salasyna kadrlar daiyndaidy.
"Djei akademiiasynda joǵary synyp oqýshylary men óndiriste jumys isteitinder úshin arnaiy baǵdarlamalar bar. Osy baǵdarlamalar arqyly mamandardy daiyndaimyz. Djei ýniversitetiniń ókilderi Qazaqstanǵa kelip, tehnikalyq ýniversitetterdi aralap, olardyń arasynan seriktesterdi tańdaidy. Korei jáne túrik tarapy bizge ushqyshsyz ushaqtardy shyǵarý tehnologiialary men quzyretterin berýge daiyn", – dep málimdedi indýstriia jáne qurylys vitse-ministri Azamat Beispekov.
