Elimizde daýlardyń 40 paiyzy tatýlasý arqyly sheshilýde. Bul týraly QR sýdialarynyń VIII sezinde Joǵarǵy sot tóraǵasy Jaqyp Asanov aitty, dep habarlaidy QazAqparat.
«Irikteý ashyqtyǵy - jemqorlyqqa qarsy is-qimyldyń basty faktory. Biz onymen qalai kúresemiz? Kóptegen jyldar boiy sotqa talaptar ósip otyrdy. Tasqyn siiaqty. 2018 jyly 4,8 mln-ǵa jetti. Kúnine 20 myń is pen material túsedi. Ár sýdia kún saiyn 11 sheshim qabyldady. Elorda men Almatyda kúnine 50 sheshimge jetedi. Dálizder ara omartasy siiaqty. Talap qoiýshy, jaýap berýshi, jankúier sanynda esep joq. Osyndai qarbalasta jemqorlyq táýekeli de joǵary. Ásirese, múddeler toǵysy men úlken aqshaǵa qatysty isterde. Biz kún saiyn 20 myńǵa jetetin konveierdi 3 ese, 6 myńǵa deiin qysqarttyq. Is az bolsa, jemqorlyq azaiady, sapa jaqsarady», - dedi Jaqyp Asanov.
Sonymen qatar ol zańdarǵa daýlasýy taraptardyń ortaq ymyraǵa kelip, daýdy beibit jolmen sheshýge múmkindik beretin tetikter engizilgenin atap ótti.
«Sýdia-tatýlastyrýshy» uǵymyn engizdik. Tatýlasýǵa beriletin ýaqytta uzarttyq. Buryn sýdiada «mynaý jeńdi, anaý jeńildi» dep aitatyn bir-aq mindeti bolatyn. Qazirgi mindeti - tatýlastyrý. Eger adamdar ózderi mán-jaidy sheship, qol alyssa, onda jemqorlyqqa múmkindik joq. Taiaýdaǵy túzetýlerden keiin beibit jolmen bitetin daýlardyń 40 paiyzǵa jetkeni qýantady», - dedi ol.
