QR Parlamenti Májilisiniń Áleýmettik-mádeni damý komiteti ǵylym máseleleri boiynsha ózgerister men tolyqtyrýlar engizý týraly zań jobasyn jumysqa aldy, dep habarlaidy QazAqparat.
«QR-nyń keibir zańnamalyq aktilerine ǵylym máseleleri boiynsha ózgerister men tolyqtyrýlar engizý týraly zań jobasyna Parlamenttiń bir top depýtatty bastamashy boldy. Zań jobasynda sybailas jemqorlyq táýekelderin boldyrmaý jáne qarjylandyrý rásimderiniń ashyqtyǵyn qamtamasyz etý maqsatynda ǵylymi jáne ǵylymi-tehnikalyq qyzmetti granttyq jáne baǵdarlamalyq nysanaly qarjylandyrýdyń quqyqtyq tetigin odan ary jetildirý kózdeledi. Sondai-aq zań jobasynda ulttyq ǵylymi keńesterdiń sapalyq quramyna qoiylatyn talaptar kúsheitiledi. Úzdik ǵylymi qyzmetker ataǵyn berý arqyly daryndy ǵylymi qyzmetkerlerdi materialdyq kótermeleý sharalary qarastyrylady», - dedi Májilistiń jalpy otyrysynda atalǵan komitetiniń tóraǵasy Beibit Mamyraev.
Depýtattyń atap ótýinshe, ózgerister úsh zańǵa engiziledi.
«Komitet osy zań jobasyn jumysqa qabyldap, ol boiynsha 2020 jylǵy 23 jeltoqsanǵa deiingi merzimge qorytyndy ázirleýge daiyn», - dedi Beibit Mamyraev.
Osydan keiin Májilis depýtattary qaýly jobasyn biraýyzdan qoldap daýys berdi.
