Elimizdiń óńirlerinde benzin baǵasyn ymyralasa otyryp kóterý belgileri anyqtalǵan joq. Bul jaiynda Májilis depýtattarynyń saýalyna QR Premer-Ministriniń orynbasary Roman Skliardyń jaýabynda aitylǵan, dep habarlaidy "Ult aqparat".
«Básekelestikti qorǵaý jáne damytý agenttigi Janar-jaǵarmai quiý stansalaryndaǵy munai ónimderiniń baǵasyna turaqty negizde monitoring júrgizedi. Básekelestik jai-kúiine saraptama júrgizý jáne baǵanyń ósý sebebin baǵalaý maqsatynda naryq sýbektilerine tiisti suranys jiberildi. Usynylǵan aqparattarǵa saraptamanyń nátijesinde Janar-jaǵarmai quiý stansalarynyń 4 iri jelisi men 6 óńirlik jelisine (Soltústik, Qazaqstan, Shyǵys Qazaqstan, Qostanai jáne Aqmola oblystary) básekelestikti qorǵaý salasyndaǵy zańnamany buzý belgileri boiynsha eskertý jiberildi», - delingen Roman Skliardyń jaýabynda.
Onyń atap ótýinshe, atalǵan jeliler bir aidyń ishinde eskertýdi oryndamaǵan jaǵdaida Kásiprkelik kodeksine sáikes tergeý júrgiziletin bolady.
«Elimizdiń óńirlerinde baǵa ymyralasý belgileri anyqtalǵan joq. Biraq, baǵa ósimi oryn alǵan. Naryq qatysýshylaryna monopoliiaǵa qarsy zańnama normalaryn túsindirý jáne baǵany negizsiz kótergeni úshin jaýapkershilik boiynsha is-sharalar qabyldandy. Munaiónimderin bólshek jáne kóterme satý naryǵyndaǵy baǵaǵa monitoring júrgizý júmystary jalǵasýda», - dep jazdy Úkimet basshysynyń orynbasary.
