Búgin Premer-Ministr Baqytjan Saǵyntaevtyń tóraǵalyǵymen ótken Úkimet otyrysynda kabeldik kárizjelilerin jalǵa berý qyzmeti tarifterin, sonymen qatar, aýyldarda kabeldi telefon men internet tarifterin retteý boiynsha Aqparat jáne kommýnikatsiialar ministrliginiń jumysy qaraldy. Memleket basshysynyń tapsyrmasynyń oryndalý barysy týraly aqparat jáne kommýnikatsiialar vitse-ministri Dinara Sheglova baiandady.
Aqparat jáne kommýnikatsiialar ministrliginiń habarlaýynsha, kabeldik kárizjeli qyzmetteriniń tarifi sońǵy eki jylda esh ózgermegen ári ol qyzmet tek zańdy tulǵalarǵa kórsetiledi.
D. Sheglovanyń aitýynsha, aýyl turǵyndaryna telefon jáne internet tarifteri boiynsha (2013 jyldan bastap) óz qunynan tómen baǵamen qyzmet kórsetiledi. Telefon bailanysy tarifi — 596 teńge (al ózindik quny — 1125 teńge), internet tarifi — tariftik josparǵa qarai 982 teńge men 1964 teńge aralyǵynda (ózindik quny — 2932 teńge).
Aýyldyq jerlerde tarif boiynsha ámbebap qyzmet kórsetetin operatorlarǵa ótemaqy biýdjet esebinen tólenedi. Biylǵy jyly osy qyzmetterdi sýbsidiialaýǵa 8,7 mlrd teńge qarjy bólingen.
«Dúniejúzilik ekonomikalyq forýmnyń Jahandyq básekelestikke qabilettilik indeksinde bailanys qyzmetteriniń tariftik qoljetimdiligi boiynsha Qazaqstan joǵarǵy orynda tur. Onyń ishinde uialy bailanys tarifteri boiynsha Qazaqstan 140 eldiń ishinde 29 orynda bolsa, al bekitilgen keńjolaqty internet qyzmetteri boiynsha 20 orynda», — deidi D. Sheglova.
Bailanys qyzmetterine baǵany tómendetý boiynsha tapsyrmany oryndaý maqsatynda QR AKM barlyq iri bailanys operatorlarynyń: «Qazaqtelekom» AQ, «Transtelekom» AQ, «Qaztranskom» AQ, «Ksell» AQ, «Kar-Tel» JShS, «Mobail Telekom-Servis» JShS qatysýymen keńes ótkizdi.
«Keńes qorytyndysy boiynsha bailanys operatorlary qoljetimdi «áleýmettik» tariftik josparlardy ázirleý arqyly bailanys boiynsha kórsetiletin qyzmetter tarifin tómendetýdi usyndy. Aqparat jáne kommýnikatsiialar ministrligine osy aidyń sońyna deiin jańa triftik josparlardyń qurylymy, qyzmet kórsetý kólemi men baǵalary boiynsha usynystar engizý tapsyryldy. Operatorlardan áleýmettik tariftik josparlar boiynsha aqparat alǵan soń olardy BAQ-tarda nasihattaý jumystary júrgiziletin bolady», - dep túiindedi vitse-ministr.
