Qazaqstanda aýtizmge shaldyqqan balalardyń sany 9 myńǵa jetti. Bul týraly QR Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Jyl saiyn 2 sáýirde Dúniejúzilik aýtizm máselesi týraly aqparat taratý kúni atap ótiledi. 2003 jyly elimizde aýtizm spektri buzylǵan (ASB) 77 bala tirkelse, búgingi kúni bul kórsetkish 9 myńǵa jetti. Sondai-aq statistika qazir azamattardyń aýtizm týraly kóbirek aqparat biletinin, diagnostika men tirkeý júrgizilip jatqanyn, odan bólek, soǵan sáikes kómektiń uiymdastyrylyp, belgili bir infraqurylym jasalyp jatqany týraly kórsetetinin túsiný mańyzdy. Eger balalardaǵy buzylystardyń basqa túrleri (nashar estitin, nashar kóretin jáne t.b.) úshin infraqurylym, ádistemeler, standarttar, baǵdarlamalar, mamandar men arnaiy uiymdar burynnan bolsa, aýtizmmen aýyratyn balalarmen jumys isteýde jaǵdai basqasha ekenin atap ótken jón», - dep jazdy ministr Telegram kanalynda.
Onyń atap ótýinshe, Bilim ministrligi erekshe balalarǵa jaǵdai jasaý úshin úkimettik emes uiymdarmen tyǵyz jumys isteidi.
«Asyl Miras», «Dara», «Bolashaq» qorlary, «AUTISM KAZAKHSTAN» Ulttyq qaýymdastyǵy jáne basqa da uiymdarǵa atqarǵan aýqymdy jumystary úshin alǵys aitamyn. Olar inkliýzivti qoldaý kabinetterin, balalarǵa arnalǵan resýrstyq ortalyqtardy ashyp, pedagogterdiń biliktiligin arttyrýdy uiymdastyrady, sondai-aq ýniversitettermen yntymaqtastyq ornatyp, zańnamaǵa ózgerister engizýge bastamashylyq jasap keledi. Keshe konferentsiia ótkizdik. Oǵan úkimettik emes uiymdar men qoǵamdyq birlestikterdiń ókili, ata-analar qaýymy, pedagogter, ǵalymdar men oqytýshylar, JOO rektorlary, sondai-aq kafedralar men oqý bólimderiniń jáne oqý-ádistemelik kabinetteriniń 400-den astam ókili qatysty», - dedi Ashat Aimaǵambetov.
