Premer-Ministrdiń orynbasary Roman Skliar elimizdegi asyl tuqymdy mal basynyń sanyna qatysty túsinik berdi, dep habarlaidy "Ult aqparat".
«Búgingi kúni asyl tuqymdy maldyń úles salmaǵy ósýiniń oń serpini saqtalýda. Mysaly, eger 2010 jyldyń 1 qańtaryna sharýashylyqtyń barlyq sanattaryndaǵy asyl tuqymdy iri qara maldyń (IQM) sany 344,1 myń basty qurasa nemese asyl tuqymdy maldyń jalpy mal basyna shaqqandaǵy úles salmaǵy 2,9% qurasa, 2021 jyldyń 1 qańtaryna sharýashylyqtyń barlyq sanattaryndaǵy asyl tuqymdy IQM sany 978,6 myń basty qurady nemese asyl tuqymdy maldyń jalpy mal basyna shaqqandaǵy úles salmaǵy 12,5%-ǵa deiin ósti, onyń ishinde negizgi mal basy qazaqtyń aqbas jáne áýliekól tuqymdaryna tiesili», - delingen Úkimet basshysy orynbasarynyń depýtattar saýalyna bergen jaýabynda .
Onyń aitýynsha, reprodýktor sharýashylyqtar arqyly jyl saiyn 109 myńnan astam asyl tuqymdy tól elimizdiń fermerlik sharýashylyqtaryna ótkiziledi.
«Sondai-aq asyl tuqymdy usaq mal basynyń (UM) da ósýi baiqalady. Mysaly sońǵy 10 jylda asyl tuqymdy UM sany 959,5 myń bastan 2 725,7 myń basqa jetti nemese 139,1%-ǵa ósti, asyl tuqymdy jylqy sany 109 myń bastan 225,7 myń basqa jetti nemese 207 paiyzǵa ósti. Sonymen qatar, sońǵy jyldary etti baǵyttaǵy tuqymdyq buqalardy paidalana otyryp, IQM-niń analyq basymen selektsiialyq jáne asyl tuqymdyq jumys baǵdarlamasyna (tuqymdyq túrlendirý) qatysýshy sharýashylyqtar sanynyń ósýi baiqaldy», - deidi R. Skliar.
Mysaly, 2016 jyly IQM tuqymdyq túrlendirýmen ainalysatyn sharýashylyqtardyń sany 15,8 myńdy qurady, 2020 jyldyń qorytyndysy boiynsha 25,3 myń fermerlik sharýashylyq tuqymdyq túrlendirýmen ainalysýda.
«Aita ketý kerek, memlekettik qoldaý sharalary esebinen uiymdastyrylǵan sharýashylyqtarda mal ónimdiliginiń ósýi baiqalady, aýyl sharýashylyǵy kásiporyndaryndaǵy maldyń ortasha tiridei salmaǵy sońǵy bes jylda 2,5%-ǵa nemese 400 keliden 411 kelige deiin ósti», - dedi ol.
Budan buryn habarlanǵandai, Májilistiń jalpy otyrysynda depýtat Amanǵali Berdalin elimizdiń klimat ereksheligine beiimdelgen otandyq asyl tuqymdy mal sapasyn arttyrý máselesin kóterip, depýtattyq saýalyn Premer-Ministrdiń orynbasary Roman Skliarǵa joldady.
