Qazaqstanda alǵash ret I Halyqaralyq media jáne týrizm forýmy ótti. Túrkitildes jýrnalister qorynyń bastamasymen ótken halyqaralyq sharanyń maqsaty media jáne týrizm salasyndaǵy jańa úderisterdi eskere otyryp, tájiribe almasý, aqparat almasý keńistigin keńeitý, ózara tiimdi ortaq jobalardy júzege asyrý, Qazaqstannyń tarihi-mádeni oryndaryn sheteldik jáne otandyq buqaralyq aqparat quraldarynda keńinen nasihattaý, jýrnalister arasyndaǵy yntymaqtastyq pen áriptestik bailanysty nyǵaitý, – dep habarlaidy «Ult aqparat».
Almaty oblysynyń ortalyǵy Qonaev qalasynda Qazaqstandaǵy týrizm, media, PR, sintetikalyq media taqyrybynda I halyqaralyq media jáne týrizm forýmy ótti. Sharaǵa Qazaqstan, Ulybritaniia, Shveitsariia, Avstriia, Belgiia, Germaniia, Frantsiia, Niderland, Moldova, Soltústik Kipr, Túrkiia respýblikasy, Ózbekstan, Ázerbaijan, Qyrǵyzstan siiaqty shet memleketterden 200-den astam adam qatysty.
Forýmnyń ashylýynda sóz alǵan Almaty oblysynyń ákimi Marat Sultanǵaziev: «Eki kún óńirimizge degen nazar erekshe bolyp tur. Qonaev qalasynda qos birdei halyqaralyq deńgeidegi shara – media jáne týrizmniń halyqaralyq forýmy jáne áýe sharlarynyń festivali ótip jatyr. Álemniń 15-ke jýyq memleketiniń jáne elimizdiń kóptegen óńiriniń BAQ-nyń ókilderi qatysyp otyrǵan media forýmnyń mańyzy zor. Bul iri eki shara óńirimiz týraly aqparattyq keńistikte oń pikir qalyptastyrady degen senimdemiz. Sebebi Almaty oblysy úshin týrizmdi damytý – bul mańyzdy ekonomikalyq faktor», – dedi.
Al Túrkitildes jýrnalister qorynyń prezidenti Náziia Joiamergenqyzy álemdik týrizmniń pandemiiadan keiin damyǵanyn atap ótti.
«Almaty oblysy – qazaqtyń ejelgi ádet-ǵurpy, tarihy, salt-dástúriniń eń basty damý mekeni. Sol sebepti forým biyl osy jerde uiymdastyrylyp otyr. Tamyzda Antaliiadan jýrnalister kelip, óńir basshysynyń qoldaýymen bul jerde taǵy da aýqymdy shara ótedi. Onda týrizmdi damytý, investitsiia tartý sekildi máseleler qarastyrylatyn bolady. Shetelge shyǵý jaqsy, biraq, Qazaqstannyń da kórikti jerleri kóp, solardy áleýmettik jelide nasihattap, ishki týrizmdi damytýǵa shaqyramyn», – dedi qor prezidenti.
Halyqaralyq media forýmnyń ashylý saltanatyna arnaiy kelgen QR Aqparat jáne qoǵamdyq damý ministri Darhan Qydyráli forým qatysýshylaryn quttyqtady.
«Barshańyzdy Jetisý jerinde Túrkitildes jýrnalister qory uiymdastyryp otyrǵan forýmnyń ashylýymen quttyqtaimyn. Memleket basshysynyń Jarlyǵymen Almaty oblysy ekige bólinip, jańa oblys ortalyǵy Qapshaǵai qalasyna Qonaevtyń esimin berý – tarihi ádilettilik boldy. Oblysqa alǵash ret kelip otyrǵandyqtan, óńir basshylyǵyn osy tarihi sheshimmen quttyqtaimyn. Ózderińizge belgili, el arasynda "tarih Shýmerden bastalady" degen sóz bar, al bizdiń tarihymyz Ile ózeninen bastalady. Tipti, kóne túrik kúntizbelik múshel jyl sanaýy Ile ózenimen bailanysty. Qonaev qurylǵaly beri aýqymdy is-sharalar uiymdastyrylyp keledi. Oblys ákimi aityp ketkendei, týrizmdi damytý úshin BAQ-nyń aqparattyq nasihaty mańyzy erekshe. Búgingi media men týrizmdi bir jerge toǵystyrǵan forým Almaty oblysynyń týrizmi damýyna septigin tigizedi», – dedi ministr.
Forýmnyń resmi bóliminiń aldynda qatysýshylar úshin arnaiy press týr uiymdastyryldy. Almaty oblysynyń basty tabiǵi bailyǵy taýlary men ózen-sýlary. Forýmnyń alǵashqy kúninde shetelden kelgen qonaqtar men aimaqtan jinalǵan tilshiler Sharyn men Kólsaiǵa baryp, týrizmdi damytý máselesimen tanysty. «Men Almaty oblysynda birneshe ret boldym. Kórikti Kólsaidy, Sharyndy kórdim. Bul ólkede tabiǵat bergen syi kóp. Sony týrizm kóshine ainaldyrý kerek. Eń bastysy árine týrizm salasyn damytý. Osyndai forýmdar ótkizý soǵan yqpal etedi» dedi forýmnyń Ulybritaniiadan kelgen spikeri Vatan Óz.
Atalǵan forým «Týrizm men jańa kommýnikatsiialardy damytýdaǵy BAQ-tyń mańyzy», «Qazaqstandaǵy týrizm: damý keleshegi men múmkindikter», «Media. PR jáne týrizm indýstriiasy», «Sintetikalyq media: kontent qalyptastyrýdaǵy neirojúie» syndy taqyryptardy qamtydy.
